Isaías 2:1-5
Ñañe’ë vove arakuéra paha rehe, ñañe’ëva’erä umi ára mboyvegua ohasamava’ekuére. Ñañe’ëta vove mba’e paha rehe, ñañemongetava’erä iñepyrü rehe, ndikatúigui jaguereko paha ñepyrü’ÿre. Ha avei ndikatúi jaguereko ñepyrü paha’ÿre. Moköivéva oñomoirü. Ñepyrü ha paha ojogueraha opa mba’épe.
Kuimba’ekuéra yvy ape arigua ohaikuaa kuatiáre tembiasakuéra. Upeichaite, upévare ikatu jaikuaa umi mba’e ojehuva’ekue ymave. Jaguereko avei kuimba’ekuéra hérava historiador ohaiva’ekue tembiasakuéra. Ñandejára rehe ojeroviáva ikatu ohai Ñanderuete momarandukuéra. Ñandejára ñe’ëme jajuhu heta mba’e ojehútava tenondeve. Kuimba’ekuéra historiador-va he’ikuaa ñandéve umi mba’e ojehumava’ekue, Ñandejára ñe’ë rupive ikatu jaikuaa umi mba’e ojehútava tenondeve, péicha avei umi kuimba’e ojeroviáva Ñandejárare ha omoñe’ëva La Biblia heta mba’e omombe’ukuaa ñandéve.
La Biblia he’i ñandéve oguahëtaha aravo pe tiempo opataha. Ijetu’u ñandéve guarä jajepy’amongeta haguä umi mba’ére, ñane rembiapoitereígui ha ja’e jepi nahembyiha ñandéve pe tiempo. Jaguereko jepi avei heta tembiapo ko’ë ko’ëre ha umíva ñamohu’äva’erä katuete. Ñañeñapytïvaicha pe tiempo ha tembiapokuéra rehe.
Ohasa aja arakuéra jaguereko jepi tembiapo jajapova’eräva, upévare ijetu’u jajepy’amongeta haguä umi mba’e ojehútavare tenondeve UMI ÁRA PAHÁPE. Profeta Isaías ohecha ha ohaiva’ekue umi mba’e ha umíva rehe ñañemongetáta. Ñamoñe’ëta Isaías capítulo 2, versículo 1 guive 5 peve, upéva oï La Biblia, Antiguo Testaméntope:
1 Isaías Amoz ra’y ohechava’ekue, Judá ha Jerusalén guigua.
2 Ojehúta ára ko’ëramo guápe: Yvyty oïháme Ñandejára Róga, yvytykuéra ru’äme opyta hatäta ha opaite yvytýgui ijyvatevéta. Opa tetä hese oñembyatýta.
3 Heta tetä he’íta oúvo: “Jaha jajupi Ñandejára yvytýpe, Israelgua Ñandejára Rógape, ohechaukáta ñandéve hape ha hape rupi jaguatáta” Sióngui osëta Ñandejára rembiporavopy ha Jerusaléngui katu iñe’ë.
4 Ñandejára ombojovakéta tetänguérape, joavy oïva tetänguéra rupi Ha’e omoï poräta, umi tetä mombyryve oïvape jepe. Kyse pukúgui ojejapóta yvy mbovoha ha kyse yvukúgui machéte. Ndaiporimo’ävéima ñorairö, avavépe noñembo’emo’äi mba’eichapa oñorairöva’erä.
5 Néike, Jacob rogagua! Jaguata katu Ñandejára ohesapeha rupi!
Profeta Isaías omombe’u ñandéve mbohapy MBA’E AÑETEGUA ojehechátava umi ára pahápe.
ÑANDEJÁRAPE ÑEMOMBA’EGUASU upéva ojehúta añetehápe umi ára pahápe. Ko’ä versículo rupive oje’e ñandéve opaichagua ñemomba’eguasu oñemoambuetaha, upéva he’ise, oñemboyketaha. Oïta peteï ñemomba’eguasu añeteguáva Ñandejárape, upéva ojehúta yvyty oïháme Ñandejára róga, ojekuaáva upe téra rupive. Ojehechakuaáta upe tenda. Oïta yvytykuéra ru’äme, opavave ohechakuaáta, opa rupiete avei. Tetäyguakuéra oñembyaty joáta hese.
Jesús oñe’ëva’ekue pe kuñajarai Samariagua ndive ha he’iva’ekue chupe: “Ñandejára niko Espíritu; upévare umi omomba’eguasúva chupe omomba’eguasuva’erä añetehápe, Ñandejára Espíritu oipotaháicha.” Upeichaite, upe ojehútava umi ára pahápe niko oñemomba’eguasúta Ñandejárape ha ñemomba’eguasu añetegua Ñandejárape ojehúta upérö.
Upe ñemomba’eguasu oïta opaite mba’e ári: “Upe ára yvypóra omombóta itupä gua’ukuéra, anguja ha mbopikuérape, umi tupä gua’u óro ha plata, ha’e ojapova’ekue oñesü haguä henondépe.” Upéichaite, ambuekuéra ñemomba’eguasu oñemboykepáta.
Tetänguéra oñembyatypáta. Oïta ñehenói maymáva tetänguérape ou haguä omomba’eguasu. Ko’ágä rupi, oï hetave 160 gui tetä ko yvy jerére ha hetave okakuaa ohóvo. Ára tuichaitéta upérö pe ñemomba’eguasu añetegua Ñandejárape guarä oñemohenda vove ambuekuéra ñemomba’eguasu rangue ha mayma tetänguéra oñembyaty upevarä.
Opavave ko yvy jerére oheka añetegua. Péicha avei, ko’ágä rupi, kuimba’ekuéra ha kuñanguéra ikorasö ruguaite guive oheka pe añete. Umi religión japu oïva ko yvy apére ohenói avei sapukái reheve oñemomba’eguasu haguä añetehápe. Maymáva ojeroviáva Ñandejárare oipota upéva ojehu.
ÑANDEJÁRA ÑE’Ë AÑETE upéva ojehechakuaáta upe árape. Ambuekuéra ñe’ë oñemoambuéta, oñemboykepáta. He’ Isaías: “Heta tetä he’íta oúvo: Jaha jajupi Ñandejára yvytýpe, Israelgua Ñandejára rógape.” Rehechakuaápa, moöpa oï Ñandejára rembipota yvu? ÑANDEJÁRA rógape ha upéva Jacob ha Israelgua Jára
róga. Ha’e niko Ñandejára ohechaukáva ñandéve hembipota, chupe jajuhu Bíbliape, Ha’e niko Ñandejára ojekuaaukava’ekue hemimondokuéra rupive, avei Ita’ýra Jesucristo rupive. Kuimba’ekuéra jepy’amongeta niko vyrorei ha ndoguerekói esperanza. Ñandejára ñe’ë añete ha Israelgua Ñandejára rógape oñembyatypáta tetänguéra ohendu haguä Ñandejára ñe’ë ha oikuaa haguä tape añete.
Ñandejára ñe’ë ñanemombarete, ñane mbo’égui. Ñane mbo’éta Ñandejára rape, ha jaguatáta Ñandejára rape rupi. Ñande ñaikotevë Ñandejára ñe’ë ñande rekovépe guarä. Ndajaikuaamo’äi, ndaipóriramo ñane mbo’éva. Ndikatumo’äi jaguata Ñandejára rape rupi ndajaikuaái ramo mávapa upe tape.
Ñandejára ñe’ë añete, ipokatu ha imarangatu, omboykéva ambuekuéra ñe’ë. Ipype, ñaikümby ha jaikuaa Ñandejára rape ha mba’éichapa jaguatava’erä ko yvy ape ári. Jaguatava’erä Ñandejára rape rupi ha jaiporavova’erä jaguata hese, jahejávo ambuekkuéra tape. Upe jeroviauka ome’ë ñandéve Ñandejára ñe’ë añete.
Ñandejára ñe’ë ipu’akapáta. He’i Isaías: “Sióngui osëta Ñandejára rembiporavopy ha Jerusaléngui katu iñe’ë.” Sióngui osëta tembiapoukapy, Ñandejára rembiapoukapy. Angirü che rendúvah, tekotevë ejesareko ko mba’e rehe, Ñandejára rembiapoukapy omyi’ÿva, naiñambuéiri araka’eve. Ñandejára rembiapoukapy imbarete ha ipyrenda porä. Ñandejára rembiapoukapy ipu’akáta. Ñandejára ñe’ë oúta Jerusalén gui. Nde rehechakuaáta ojehuha Ñandejára ñe’ë. Ñandejára oñe’ëmava’ekue, Ñandejára oñe’ëta. Ñandejára ñe’ë añete omboykéta ambuekuéra ñe’ëme ha opaichagua kuimba’ekuéra temimo’ä hendape’ÿ, upe árape oïta Ñandejára ñe’ë añete.
Ñande jaguereko ko’ágä Ñandejára ñe’ë añete ñane ndive, upéva La Biblia. Ha’e ñanderesape’a, ñandehekombo’e ha omombarete ñane ánga, jajapóramo ipype he’íva.
ÑANDEJÁRA REMBIPOTA AÑETE upéva oguerúta py’aguapy umi ára pahápe. Ñandejára rembipota omboykéta ambuekuéra rembipotápe, Ñandejára ha’éta mbojovakehára. Ha’e ombojovakéta tetänguérape. Ha’e oipurúta tenda imba’énteva voi. Peteï jey, Jesús he’iva’ekue idiscípulokuérape Ñandejára omoïhague ipópe opaite ñembojovake. Ha’e ombojovakéta tetänguérape, ha joavy oïva tetänguéra rupi Ha’e omoï poräta. Ha’e oisämbyhýta chupekuéra hembipota reheve. Profeta Isaías capítulo 11 iñarandukápe omyesakä porä upéva. Ñandejára oporombohovakéta heko marangatu ha hekojoja reheve. Ha’e ombojovakéta tetänguérape.
Ñandejára osämbyhýta chupekuéra Ha’e oipotaháicha. Upéva ojehúta tetänguéra mbytépe, upévare “kyse pukúgui ojejapóta yvy mbovoha, ha kyse yvukúgui machéte.” Umi arma oguerúva mano ha ñehundi oikóta chuguikuéra d arma productiva: kyse pukúgui ojejapóta yvy mbovoha, ñemitÿrä ha umi kyse yvukúgui machéte ojepurúva avei ñemitÿrä ha oñemopotï haguä kokue. Opáta ñorairö. He’i Isaías: “Ndaiporimo’ävéima ñorairö, avavépe noñembo’emo’äi mba’éichapa oñorairöva’erä.”
Upeichaite, ñamomba’eguasu Ñandejárape, oikóta hembipota añetegua. Oikóta opaichagua tetänguéra apytépe ha upéva ñande rupyty ñandéve. Ko’ä momarandu oje’eva’ekue Jacob rogayguápe ha iñemoñarenguérape, oguahë ñandéve avei. Upévare, jaguata Ñandejára resapépe! ¡Ñamomba’eguasu Ñandejárape! Umi ára pahápe Ñandejára rembipota oikóta añetehápe. Opaichagua kuimba’ekuéra rembipota taha’e ha’éva opytáta yvýre, oñemboykepaitéta, opyta reipáta.
Ko’ä mba’e ojehútava umi ára pahápe ñanemokyre’ÿva’erä jaiko haguä Ñandejára oipotaháicha ha ñanemandu’a: umi ára pahápe Ñandejárape oñemomba’eguasúta añetehápe, Ñandejára ñe’ë añete ojehechakuaáta ha Ñandejára rembipota oikóta ha maymáva tetänguéra ohecháta upéva. Ko’ágä tekotevë ñamombe’u ko’ä mba’e añetegua ojehútava umi ára pahápe.