Ñandejára Techaukaha Añete

hft guarani 2022
Hope for Today (Guarani)
Ñandejára Techaukaha Añete
Loading
/
Isaías 7:10-16

Aikuaa nde cheichaha avei. Moköivéva jaikuaase mba’épa ojehúta tenondeve – heta jey jaheka techaukaha ombohapéva ñandéve mba’épa ojehúta. Jaguata ramo ka’aguy rupi ikatu jaheka mba’e techauka ohechaukátava ñandéve moö gotyopa jahava’erä, taha’e peteï aviso térä peteï óga. Añetehápe opavave jaikuaase moö gotyopa jaha. Ndagueroviái oïne haguä he’íva añetehápe: “Ndaikuaaséi moö gotyopa aha.” Ndaupéichai, opavave jaikuaase añetehápe moö gotyopa jaha.

Angirü che rendúva, Ñandejára ome’ëva’ekue ñandéve peteï aranduka ñane pytyvökuaáva jaikuaa haguä moö gotyopa jaha. Upe aranduka omombe’u avei ñandéve pe tape añetegua jaha haguä hese. Upe aranduka niko La Biblia. Ko árape jahechakuaáta oñondive umi TECHAUKA ÑANDEJÁRA OME’ËVA. Ñamoñe’ëta La Biblia, Antiguo Testamento, aranduka Isaíaspe, capítulo 7, versículo 10 guive, 16 peve. Upépe he’i kóicha:

10. Ñandejára he’i avei Acazpe:

11. “Ejerure Ñanderuetépe tojapo techapyrä mba’e rechaukaha ramo, yvyguy hypyvehápe, térä yvate ijyvatevehápe”.

12. Acaz he’i: “Ndapy’ara’ämo’äi Ñandejárape ajerurévo mba’e rechaukaha.

13. Upérö Isaías he’i: “Pehendu peë mburuvicha guasu David róga pegua: Hesa’i gueteripa peëme pemokane’ö yvyporakuérape, ajeve pemokane’öséma avei Túva Ñandejárape?

14. Ñandejára voi ome’ëta peëme mba’e rechaukarä; pe kuñataï hyeguasu ha imemby mitäkuimba’éta, ombohératava Emanuel.

15. Ho’úta kesu pyahu ha eíra, ojeikuaa peve ivaívagui ha oiporavokuaa peve iporäva.

16. Ojeikuaa mboyve ivaívagui oiporavo haguä iporäva niko, umi moköi mburuvicha guasu nemongyhyjéva retä ojehejáta.

Ko’ä versículo ñamoñe’ëva’ekuépe jajuhu EVIDENCIA ñane pytyvöva’eräva ñaikümby haguä pe techaukaha Ñandejára ome’ëva ñandéve.

MBA’ÉGUIPA ÑANDEJÁRA ome’ë techaukarä añetéva omoañetévo Ha’e oisämbyhyha. Profeta Isaíaspe Ñandejára ohekombo’eva’ekue oikuave’ë haguä techapyrä mba’e techaukaha ramo Acazpe. Upe kuimba’e hérava Acaz ha’eva’ekue Rey tetä Israelpe profeta Isaías oikóramo guare, upéva niko 500 térä 600 año Cristo mboyve. Ñanderuete, profeta Isaías rupive, oikuave’ë rey Acaz pe tape oikuaa haguä mba’épa ojehúta. He’i aranduka Isaíaspe: “ Ñandejára he’i avei Acazpe: “Ejerure Ñanderuetépe tojapo techapyrä mba’e rechaukaha ramo…”

Oje’e avei Acazpe ikatuha ojerure techaukaha oimeraë hendápe: “yvyguy hypyvehápe, térä yvate ijyvatevehápe”. Upéva ñaikümby porä, Ñanderuete oïgui opaite hendápe, upévare, rey Acaz ikatu ojerure techaukaha oimeraë hendapegua, taha’e yvyguýpe térä ijyvatevehápe.

Rey Acaz katu ndooipotái. Ha’e he’iva’ekue: “Ndajeruremo’äi.” Che aguerovia rey Acaz ha’eva’ekue mburuvicha guasu ojapova’ekue heta tembiapo vai, ndohejaséi hembiapo vaieta. Upévare, ombohovái ndojeruremo’äiha techaukaha Ñandejárape, omo’äségui hembaipo ky’a ha he’i: “ndapy’ara’ämo’äi Ñandejárape.” Ha’e ohechauka py’amirï gua’u, pe “falsa humildad” oje’eha. Acaz niko nomomba’eguasuiva’ekue Ñandejárape ikorasöme. Ohechauka py’amirï gua’u.

Ñandejára niko oikuaa porä upeichaha. Ñanderuete ojojuhuseva’ekue Acaz ndive. Ñanderuete oipotava’ekue Acaz oguereko techaukaha úva chugui ha Acaz ndoipotái. Jahecha ko’ágä ambue mba’e tekotevëva jaikuaa ñaikümby haguä techauka ome’ëva Ñandejára, Ha’e oisämbyhyha opa mba’e ojehuva’ekue ha ojehútava ko yvy ape ári.

ÑANDEJÁRA ÑE’Ë POHÝI omyesakä ñandéve Ha’e oisämbyhyha opaite mba’e. Rey Acaz ombohovái ndojeruremo’äiha techaukarä profeta Isaías he’íramo guare chupe ojerure haguä, Ñandejára oñe’ë David ñemoñarenguérape. Rey Acaz niko ha’eva’ekue rey David ñemoñare. Ha’e niko omoakäva’ekue upérö David rogaygua ñemoñarenguérape. Umi mburuvicha guasu oisämbyhyva’ekue tetä, umívape ojekuaa David rogagua ramo, ha’égui Rey David ñamoñare.

Upémarö, ojeja’o chupe, ohupyty chupe ñe’ë pohýi Ñandejáragui. Chupe guarä niko ndaha’éi mba’eve omokane’ö yvyporakuérape, ha omokane’öma avei Ñanderuetépe, upéicha he’i profeta Isaías. Rey Acaz ndotrata poräiva’ekue avavépe upérö. Profeta Isaías oja’o ha iñe’ë pohyiva’ekue rey Acazpe, he’ívo chupe noiporäiha hekove Ñandejára ndive.

¡Ajépa ipohýi upe oje’eva’ekue chupe! Tekotevëva’ekue Isaías he’i rey Acazpe upéva. Ñe’ë pohýi Acazpe guarä. Ñandejára, Profeta Isaías rupive oja’ova’ekue rey Acazpe, oimo’ä haguére ikatuha ojapo Ñandejára rehe, upe ojapoháicha kuimba’ekuérare. Upépe jajuhu mbohapyha mba’e ñane pytyvökuaáva jahechakuaa haguä Ñandejára oisämbyhyha opaite mba’e ojehúva’ekue avei umi mba’e ojehútava ko yvy ape ári.

ÑANDEJÁRA MBOHOVÁI omombe’u ñandéve ha’eha techaukaha añetéva Ñandejára oisämbyhyha opa mba’e ojehuva’ekue ha ojehútava ko yvy ape ári. He’i aranduka Isaíaspe kóicha: “Ñandejára voi ome’ëta peëme mba’e rechaukarä; pe kuñataï hyeguasu ha imemby mitäkuimba’éta, ombohératava Emanuel.” Péva ha’eva’ekue Ñandejára mbohovái rey Acazpe. Techaukaha ha’e mitäkuimba’e imembýtava peteï kuñataï. Hérata Emanuel, he’iséva Ñandejára ñane ndive. Ha’éta ambuekuéra mitäicha, ho’úta tembi’u ambuekuéra hoúva ha okakuaáta oiporavokuaa peve, ojeikuaa peve ivaívagui ha oiporavokuaa peve iporäva. Pe mitä, onaséva peteï kuñataï virgen gui, héra he’iséva Ñandejára ñane ndive, ha’e techaukarä añete Ñandejára ome’ëva. Péva ha’e Ñandejára mbohovái.

Upémarö, profeta Isaías he’i rey Acazpe upe okyhyjéva ojehutaha pya’ete. He’i chupe: “Ojeikuaa mboyve ivaívagui oiporavo haguä iporäva niko, umi moköi mburuvicha guasu nemongyhyjéva retä ojehejáta.”

Tekotevë ñaikümby porä upéva jaikuaa haguä mba’e mitäpa. Ko capítulo 7 pe versículo 3, Isaías oguerekova’ekue hendive ita’ýra tee hérava Sear-Jasub. Ikatuva’ekue Sear-jasub mitära’y michïetéva, Isaías oguerekóva ijyva ári. Upe mitä mboyve, Isaías ojokóva ijyva ári, ita’yratee, ojeikuaa mboyve ivaívagui oiporavo haguä iporäva, umi moköi mburuvicha guasu retä rey Acaz okyhyjeha oñehundíta. Upéva ñamoñe’ëkuaa La Bibliape jaikuaa haguä mba’éichapa ojehu raka’e upéva.

Ñandejára mbohovái rey Acazpe ha’eva’ekue moköi techaukarä. Peteïva, pe kuñataï hyeguasútava ha imembýtava peteï mitäkuimba’e. Moköiha techaukarä, umi moköi mburuvicha guasu retä rey Acaz okyhyjeha oñehundíta. Pe techaukarä añete Ñandejára ome’ëva ñandéve ha’e Emanuel — ¡ ha’e niko Jesús onaseva’ekue Virgen María gui!

Techaukarä Ñandejára ome’ëva ha añetéva niko ñahesa’ÿijóma: mba’érehepa Ñandejára ome’ë, Ñandejára iñe’ë pohýi ha Ñandejára ombohovái. Ñanderuete oisämbyhy opaite mba’e ojehuva’ekue ha ojehútava ko yvy ape ári. Jahechakuaáke ñane rembiapo, anítei rey Acaz ojapo haguéicha ñamboykese Ñandejárape. Tekotevë jajerovia Jesucristo rehe, Ñandejára ombouva’ekue jaikuaa haguä chupe ha oï haguä ñande ndive ha ñande pype.

Receive Weekly Encouragement

Sign-up to get a sermon straight to your inbox on a weekly basis!