Isaías 40:18-24
Nde reiméramo ne año ka’aguýre ha peichahágui reguahë ysyry guasu renondépe, mba’éichapa rehasáne upe ysyry ndoguerekóiramo puente ha ipypukuetereíramo reyta haguä? Ysyry ohasa pya’etereíramo ha hembe’y henyhë itágui. Mba’éichapa reguahëta ambue y rembe’y gotyo? Ikatu nde ere, reikotevëtaha peteï balsa, canóa, térä piola anambusu ha máva ikatúva ne pytyvö rehasa haguä.
Angirü che rendúva, ñande rekove ikatu ñambojoja ysyry rehe avei. Ohasa haguä hekove rupive heta oï oñeha’äva ha’eñoite ha nosë poräi chupe mba’eve. KUIMBA’E ÑEHA’Ä REI ohechauka nandiha, ndovaleiha mba’everä.
Antiguo Testamentope, Profeta Isaías ohai aranduka Isaías capítulo 40, versículo 18 guive 24 peve, kuimba’e rembiapo ovale’ÿva rehe. Ñamoñe’ë:
18 Mávarepa pembojojáta Ñandejárape? Mba’eichagua ta’angápa pemoïta hendaguépe?
19 Ta’änga apoha omboyku ta’ängarä, mba’e jegua apoha ombyape óro ha ojapo chupe jeguaka ajurigua sä plata.
20 Pe oikuave’ëtava mboriahu kuave’ë, oiporavo yvyra ituju’ÿva ha oheka ta’änga apoha ha’evéva, ojapo haguä chupe ta’änga ovava’ÿtava,
21 Ndapeikuaái nga’u piko? Araka’eve piko napehendúi? Noñemombe’úi piko peëme iñepyrüha guive? Ndoikéi piko pene akäme mba’éichapa oiko ra’e ko yvy?
22 Ha’e oguapy ko arapy ári ha upe guive yvypóra tukúpe ojogua. Ha’e yvága ahojáicha oipyso, ojeiko haguä iguýpe.
23 Ha’e ohundi mburuvicha guasu kuérape ha yvy arigua sämbyhyhárape.
24 Ojogua yvyra ra’y ramónte oñeñotÿva, hapo ramo guarä ha’e oipeju hi’ári kuéra ha ipiru, ha yvytu ratä kapi’i pirukuéicha ogueraha.
Isaías omombe’u ñandéve mba’éichapa kuimba’ekuéra oñeha’ä reipa, upéva ojapo omombe’úvo heta mba’e yvyporakuéra ojapóva. Iporäitéta jajesareko ramo ko’ä mba’e rehe ñamyatyrö haguä umi mba’e vai ñande jajapóva.
KUIMBA’EKUÉRA OMOMBA’EGUASU TA’ANGA upéva ohechauka ñandéve kuimba’ekuéra ñemomba’eguasu tekotevëha oñemoambue. Isaías he’i ñandéve kuimba’e ipirapire hetáva ojapoukaha ta’anga. Kuimba’e ipirapire htáva oheka ta’änga apophápe, upe omboykúva ta’ängarä. Ta’änga apoha oyendy tata, omboyku pe metal ha hyku rire omoï peteï moldepe ojapo haguä chugui ta’anga. Upéi ogueraha upe ta’änga mba’e jegua apohápe ha ojerure chupe tojaho’i órope, ha’éva itavera hepýva. Upéi ombojeguaka sä pláta guiguávape. Ojapo chugui ta’änga neporäva ha upéi he’i hese ijaraha. Kuimba’e ipirapire hetáva ojapouka ta’änga itavera hepývagui.
Kuimba’e imboriahúva katu, ojapo ta’änga yvyrágui. Ha’e oho ka’aguýpe ha oheka yvyramáta oimo’äva ndaitujumo’äiha. Ndaipóri niko yvyramáta peichagua, ha katu, ha’e oiporavo yvyramáta iporävéva umi ojuhúva apytépe. Oity upe yvyramáta. Oikytï hakä tuicháva. Ogueraha upe hakä ta’änga apoha ha’evévape.
Upe ta’änga apoha ojapo ta’änga ovava’ÿtava imba’erä. Pe ta’änga apoha ojapopa rire ta’änga, upe ojerureva’ekue ogueraha hógape ha omohenda peteï tenda iporävehápe. Upégui nomyimo’äi araka’eve. Upe kuimba’e oimo’ä oguerekoha peteï jára, ha’éva upe ta’anga ojejapova’ekue yvyrágui. Pe ta’änga kuimba’e imboriahúva oguerekóva niko ha’e jára gua’u, ta’änga, pe kuimba’e ipirapire hetáva oguerekoháichante avei.
Ko’ä ñeha’ä ojapóva kuimba’ekuéra oñemboja haguä Ñandejára rendápe niko ndovaléi mba’everä, upeichaite! Ta’ängakuéra nañanemoaguïri Ñandejára rendápe araka’eve. Ko’äva ha’e tembiapo kuimba’ekuéra ojapo reíva.
KUIMBA’EKUÉRA NDOHECHAKUAASÉI ÑANDEJÁRA PU’AKA upéva ohechauka ñandéve kuimba’e arandu tekotevëha iñambue. Kuimba’e ndikatúi he’i ndoikuaaiha térä ndohechakuaái Ñandejára ñande Apohare Ipu’akapaha. Ñahesa’ÿijomína umi porandu ojapova’ekue Profeta Isaías: “¿Ndapeikuaái nga’u piko? Araka’eve piko napehendúi? Noñemombe’úi piko peëme iñepyrüha guive? Ndoikéi piko pene akäme mba’éichapa oiko ra’e ko yvy?” Maymáva ikatu gueteri ohechakuaa ko’ä mba’e. Opaite mba’e oïva guive ñande jerére omombe’u ñandéve Ñandejára pu’aka. Upéicha niko ñepyrüete guive, Ñandejára ojapo guive ko yvy. Maymáva kuimba’e ha kuña ohechakuaa opa mba’e oïva ijerére rupi Ñandejára Ipu’akapaha, oikuaaséramo. Heta oï ndoikuaaséiva ijeheguiete, ndaha’éi naiñarandúigui térä ndoguerekóigui katupyry.
Tekotevë rehechakuaa mba’eichaitépa Ñandejára pu’aka ha arandu. Ha’e Ijojaha’ÿ. Ha’eichagua ndaipóri ambue. Ñandejára oguapy hína ko yvy tuichakue ári. Ha’e oisämbyhy opaite mba’e. Naiporäi ndajagueroviái upeichaha. Ñandejára niko naimbojojahái. Ha’e ñande Apohare ha oï opa mba’e ári. Ha’e Ipu’akapa. Upéva hesakä poräva’erä ñandéve.
Ñandejára Imarangatu ha naimbojojái, Ipu’aka Ijojaha’ÿ, Ijyvateterei, ndikatúi avave ojupyty. Yvate guive chupe guarä yvy ariguakuéra ojogua tukúpe, mymba’i otyryrývaicha. Ejepy’amongetamína upévare. Ñandejára Ipua’kapáva, Ijojaha’ÿva ñande poravo ñande tekove kangy mimíme. Henondépe jajogua tukúpe. Ñandejára
ningo oipyso yvága ahojáicha ojeiko haguä iguýpe. Ñandejára Ipu’akapa ha Ijojaha’ÿ, ñande kuimba’ekuéra tuichavéva jepe katu ndaha’éi mba’eve.
Mburuvicha guasukuéra yvy arigua ndaha’éi mba’eve ha ha yvy arigua sämbyhyhára ndaha’éi avei mba’eve, inandi mba’e oguereivaicha. Ndopytái mba’eve imba’ekuérarä térä chuguikuérava. Naiporäi ndajahechakuaái Ñandejára Ijojaha’ÿha.
KUIMBA’EKUÉRA OJOJUHÚTA ÑANDEJÁRA IPU’AKAPÁVA NDIVE upéva ohechauka ñandéve kuimba’ekuéra arandu tekotevëha iñambue. Ko yvy ape ári ningo mba’eve ndahi’aréi. Ndaipóri py’aguapy añetéva. Ñandejára ohundíta mburuvichakuéra ha sämbyhyharakuéra yvy ape ariguápe. Heta jey ñaimo’ä, ñamañávo hesekuéra, ha’ekuéra oimo’ä oñemopyrenda mbaretétaha, opyta aretereitaramoguáicha. Ha katu, ndaupéichai. Ñandejára niko opa mba’e Jára, HA’E añoite opa árape guarä.
Mburuvicha guasukuéra ha sämbyhyharakuéra ko yvy ape arigua niko ndaha’éi mba’eve ha ndopyta aremo’äi. Ñandejára oipeju hi’arikuéra ha ka’avo kyrÿicha ipirupáta. Mburuvichakuéra, heta jey pya’eterei oñekambia ko yvy ape jerére, iñesämbyhykuéra oñemboykégui térä oñepu’ägui hesekuéra ojei haguä. Ñandejára oipejúnte hi’arikuéra ha ipirupáma. Ojegueraha kapi’i pirukuéicha, ka’avo piru ñumeguáicha, yvytu atä oipeju ha ogueraha oguerahaháicha yvytu yvyku’i desiertope-gua.
Upéicha oje’e ñandéve mombe’uanga rupive ojehutaha kuimba’ekuéra ojejuhu vove Ñandejára Ipu’akapáva ha Ijojaha’ÿva ndive. Tekotevë jaikuaa Ñandejára mba’eha opaite mba’e, Ha’ë oisämbyhy opa mba’e ha ipo guýpe oïha opa mba’e ko yvy ape árigua ha ijerére.
Ko’ä mba’e omyesakä ñandéve mba’éichapa kuimba’ekuéra oñeha’ä reipaha, hembiapokuéra nandi, ndovaléi mba’everä. Ta’ängakuéra ñemomba’eguasu hendape’ÿ. Máva oimo’ävo ikatuha ojapo ta’änga omomba’eguasu haguä oï vaíma voi. Kuimba’ekuéra ndohechakuaái ha ndohechakuaaséi voi Ñandejára Ipu’akapaha avei naimbojojái. Umi mba’e jahechakuaa ñamañávo ñande jerére jaguerekóva guive. Kuimba’ekuéra ojojuhúta Ñandejára Pu’aka ndive, kuimba’ekuéra, taha’e mburuvicha guasu térä sämbyhyharakuéra ko yvy ape arigua ohasapa ha ambukuéra oñemoï hendaguépe. Ojegueraha kapi’i pirukuéicha oguerahaháicha yvytu atä. Ñande ndikatúi jajapo mba’eve ñandejehegui. Ñandejára Ipu’akapa ha Ijojaha’ÿ, opaite mba’e oguereko ipo guýpe. Hembipota oikóta opa ára ko yvy ape ári ha ijerére. Upévare, tekotevë ñañemomirï henondépe ha jajerure chupe tañanepytyvö. Iporiahuvereko ha imborayhu ñande rehe ijojaha’ÿ avei.