Ñehenói Iporävéva
Isaías 55:1-7
Opavave jaikuaa oï jave atyguasu vy’arä ñañeñandu porä imandu’árö ñande rehe ha ñañe’invita jaha haguä upe aty guasúpe. Javy’aiterei voi jaháta haguére upe atýpe.
Ñandejára omondova’ekue avei peteï ñehenói térä invitación iporävéva, upeichavéramo jepe, heta oï ndojapysakáiva hese. Ikatu avei oï ndoikuaáiva. Umi oikuaáva katu ndojesarekói hese. Ehejamína tañe’ë ndéve pe ÑEHENÓI IPORÄVÉVA rehe. La Biblia, Antiguo Testamentope, Isaías capítulo 55, versículo 1 guive 7peve, Profeta Isaías oñe’ë Ñandejára rérape. Ñamoñe’ëmína umi versículo:
1. “Opa pende yuhéiva peju pey’u. Pende viru’ÿva peju, rei tome’ë peëme trigo. Tome’ë avei kamby ha kaguy, pehepyme’ë’ÿre.
2. ¿Mba’ére piko peme’ëta viru ndaha’éirö tembi’úre, ha pene rembiapokue repy, napene mohyguatamo’äivare? Pejapo ha’éva ha pekaru poräta, pe’úta umi mba’e hevéva.
3. Peju che rendápe ha pejapysaka, pecherendu ha peikovéta. Ajapóta pene ndive ñe’ëme’ë opa árape guaräva, amboajévo péicha umi mborayhu ñe’ë ame’ëva’ekue David-pe.
4. Che amoï chupe mba’e rechaha ha mba’e renduha ramo tetänguérape guarä. Huvicha ha hekombo’eha ramo.
5. Nde rembyatýta tetägua reikuaa’ÿvape ha pya’e oúta ne rendápe, Che, Ñandejára nde Jára, Israel gua Marangatúva rombojerovia haguére.
6. Peheka Ñandejárape ikatu aja pejuhu chupe, pehenói chupe hi’aguï jave.
7. Iñañáva toheja hape vai, mba’e vai apoha anive oguereko iñakäme ivaíva. Pejere Ñandejára gotyo, Ha’e pende poriahurerekóta, pejere Ñandejára gotyo, Ha’e niko ipojera oheja rei haguä ñandéve ñane angaipa.
Ko ñehenói iñimportánteva ojeguerúva ñandéve mbohapy JERURE rupi ha omoguahë ñandéve Ñandejára. Ñahesa’ÿijóta ko’ágä:
PEJU HA PEKARU ko ñehenói ha’e iñembyahýivape guarä. Profeta Isaías omondo ko invitación térä ñehenói maymávape ko yvy jerére: ““Opa pende yuhéiva peju pey’u. Pende viru’ÿva peju, rei tome’ë peëme trigo. Tome’ë avei kamby ha kaguy, pehepyme’ë’ÿre.” Oñehenói opavave ijyuhéiva ha iñembyahýivape, ha naimboriahúiva. Ko invitación ha’e ou haguä okaru ha oñeikuave’ë opavavépe, ohepyme’ë’ÿre. Ha katu, mboýpa hepy ndaikatúi ja’e. Pirapire ndikatúigui ojogua. Nde ikatu rehupyty rehepyme’ë’ÿre mba’eve.
Ko ñehenói ha’e opavave iñembyahýivape guarä. He’i Ñandejára ñe’ë: “Mba’ére piko peme’ëta viru ndaha’éirö tembi’úre, ha pene rembiapokue repy, napene mohyguatamo’äivare?” Nde niko ikatu rejogua heta mba’e ha péicha avei he’u hetaichagua tembi’u, upéichavéramo jepe naneryguatäi, reñeñandu nandi nde retepýpe. Heta remba’apo ko’ë ko’ëre, ha mba’épa reguereko? Umi mba’eita reguerekóva nanembovy’ái, nomyenyhéi nandi reñandúva nde retepýpe.
Ehendumína Ñandejára invitación ndéve guarä. He’i Isaíaspe: “Pejapo ha’éva ha pekaru poräta, pe’úta umi mba’e hevéva.” Péicha he’i Ñandejára, oipota ñañemboja hendápe, oipota jajapo hembipora. Ha’e ome’ëta ñandéve ñane remikotevë. Ñandejára omyenyhëta nandi ñañandúva ñane ángape. Péicha pe jerure poräite omoguahëva ñandéve Ñandejára. Ha’e ohechakuaa ñane remikotevë.
PEJAPYSAKA HA PEIKOVE ha’e ñehenói omanombotávape guarä. He’i Isaíaspe: “Peju che rendápe ha pejapysaka, pecherendu ha peikovéta.” Upéva niko añete. Upéva ogueru ñeñandu porä ha seguridad. “Pejapysaka”, upéva he’ise ñane ñe’ërendu Ñandejárape. Ñahendu upe Ha’e he’íva ñandéve. Ñandejára niko oñe’ë ñandéve. Ñahendúramo Ñandejárape jaikovéta. Ajépa iporäite! Pejapysaka ha peikovéta. Upéi, Ñandejára jerure ndive ou ñe’ëme’ë he’íva kóicha: “Ajapóta pene ndive ñe’ëme’ë opa árape guaräva, amboajévo péicha umi mborayhu ñe’ë ame’ëva’ekue David-pe.” Ñandejára ome’ë haguéicha iñe’ëme’ë rey David-pe, Ha’e ojapóta ñane ndive ñe’ëme’ë opa árape guarä. Pejapysaka ha peikove.
Upéi, Ñandejára omyesakä ñe’ëme’ë ojapova’ekue rey David ndive. Rey David-pe he’iva’ekue: “Che amoï chupe mba’e rechaha ha mba’e renduha ramo tetänguérape guarä. Huvicha ha hekombo’eha ramo.” Ko’ápe oñe’ë David ñemoñare tuichavévare.
Oïve. Jehovasa oguerúva Ñandejára ñe’ëme’ë ndaha’éi Israel-pe guarä añónte ha ñane mba’erä jajerovia vove. Ha’e avei ambuekuérape guarä. Profeta Isaías he’ive: “Nde rembyatýta tetägua reikuaa’ÿvape ha pya’e oúta ne rendápe, Che, Ñandejára nde Jára, Israel gua Marangatúva rombojerovia haguére.”
Upeichaite, nde ha che ñahendu vove Ñandejára ñe’ë, ha ñane ñe’ërendu chupe, ambuekuéra ohecháta, ha avei oúta ohendu haguä Ñandejára ñe’ë ha oikovéta. Ñandejára ome’ëta ñandéve tekove opa árape guarä, upéva ijojaha’ÿ. Ehendumína ko moköiha jerure Ñandejára omboúva ndéve ikorasö ruguaite guive: “pejapysaka, pecherendu ha peikovéta.”
PEHEKA HA PEJEVY kóva ha’e ñehenói okañývape guarä, upe ohóava tape vai rupi. He’i Isaías: “Peheka Ñandejárape ikatu aja pejuhu chupe, pehenói chupe hi’aguï jave.” Reheka haguä Ñandejárape tekotevë rejapo upéva ikatu aja. Pe ñe’ë he’íva “ikatu aja pejuhu chupe” he’ise ikatuha oguahë ára ndajajuhumo’äveimaha Ñandejárape. Jaheka chupe ikatu aja jajuhu chupe, he’ise Ha’e noïmo’ävéima aguï ñandehegui. Péva ha’e jerure iñimportánteva: jaheka Ñandejárape ikatu aja jajuhu chupe. Upéva añetegua tekotevëva rehechakuaa che angirü.
Upéi ehechakuaa mba’épa ojejapova’erä. He’i profeta Isaías: “Iñañáva toheja hape vai, mba’e vai apoha anive oguereko iñakäme ivaíva.” Péva he’i Ñandejára katuete ojejapova’erä. Avave ndaikatúi oha’arö ojuhu Ñandejárape hembiapo vai aja térä oiko aja angaipa rapére ha ivaívante oguereko ramo iñakäme. Ñandejárape ndikatúi jajuhu péicha jaikóramo. Ndikatúi ñaha’arö jajuhu chupe peichánte jaikóramo. Jaheka haguä Ñandejárape he’i Profeta Isaías jahejava’erä ñande rape vai ha anive jaguereko ñane akäme temimo’ä ivaíva. Upéva ha’e temikotevë.
Ko ñehenói ohechauka ñandéve Ñandejára poriahurereko. He’i Isaías: “Pejere Ñandejára gotyo, Ha’e pende poriahurerekóta, pejere Ñandejára gotyo, Ha’e niko ipojera oheja rei haguä ñandéve ñane angaipa.” Ñandejára Iporiahurereko, che renduhára. Upeichaite, ¡Ñamomba’eguasu Ñandejárape ñande poriahurereko haguére! Ha’e ñane ñyröta ñañembojáramo hendápe. Nde Rehechakuaáramo ne angaipa ha rejerure chupe taneperdona, Ha’e neñyröta ha nepysyröta. ¡Ñamomba’eguasu Ñandejárape!
Ajépa iporäite ko’ä jerure ha ñehenói ojapóva Ñandejára: Peheka ha pejevy. Ñandejára oha’arö ha oipota angaipa apoha ojevy hendápe. Upéicha ojapo vove ae ohupytýta ñyrö ha pysyrö.
Ñehenói iporävéva ou ñandéve mbohapy jerurehesakä poräva rupive, angirü che rendúva. Jahupyty haguä jehovasa, tekotevë ñambohovái ko’ä ñehenóime: Peju ha pekaru, pejapysaka ha peikovéta, peheka ha pejevy. Angirü che rendúva, nde reiméramo mombyry Ñandejáragui, upéicharö ejevy ha eju hendápe ko árape voi. Embohovái ñehenói ombohasáva ndéve ko árape rehupyty haguä py’aguapy ne ángape ha ijehovasa. Ñandejára nderayhu, oikuaa ne remikotevë ha ne pytyvöse.
