Isaías 5:18-23
Iñimportante ñandéve guarä jahecha moköive tova oguerekóva Ñandejára rembiapo. La Biblia ñanembo’e Ñandejára ñande poriahurerekoha avei ñane pysyröha HA’E oipotágui. Ñandejára niko hekojoja ha ndoguerekói mba’érehepa ñane perdona haguä. Ñandejára ñane perdona ñande ñamombe’u vove chupe ñane rembiapo vai ha ñaime porä vove hendive. Upéva he’ise tekotevëha jaikuaa mba’épa HA’E ohechakuaa ñande juzga haguä ha mba’éichagua justicia-pa oipuru.
Upe Ñandejára oipurúva ñande juzga haguä niko la Biblia, angirü che rendúva. Opavave tekove oguerekoséva py’aguapy ojapova’erä upe Ñandejára he’íva. Opavave oñemoïva Ñandejára rembipota rehe ohasa’asýta. Ñandejára he’i ñandéve La Santa Bibliape mba’épa hembipota. HA’E ome’ë ñandéve añetegua iñe’ëme.
Ymave tetä Israel-pe, Ñandejára omondova’ekue profeta-kuéra ombo’e ha omomarandu haguä hetäguáme. Omondova’ekue umi profeta, hetägua oikuaa haguä hembipota ha iñe’ërendu haguä chupe. Isaías ha’eva’ekue peteïva umi profeta. Isaías py’ÿiete oñe’ë pohýiva’ekue hetägua Israel-pe. Antiguo Testamento, aranduka Isaías capítulo 5, versículo 18 guive, 23 peve, profeta Isaías oñe’ë ñandéve TUICHA ÑEMBYASY rehe, ha he’i:
18. Cháke peë, japúpe perotyryrýva pende reko aña ha pene rembiapo ahë, kárro ojererahaháicha!
19. Peë pejéva: ¡Tojapo pya’ékena Ñandejára upe he’íva ojapotaha jahecha haguä. Israel Jára Imarangatúva tohekombo’e roikuaa haguä!
20. ¡Cháke peë, pejéva iporäha pe ivaíva, ha ivaiha upe iporäva; pejéva upe hendývare iñypytüha, ha iñypytüvare pejéva hendyha;iróvare pejéva he’ëha,ha he’ëvare iroha!
21. ¡Cháke peë, peimo’äva pene aranduha, pejéva pene akä poräha!
22. ¡Cháke peë, kaguy je’úpe napenderasaháiva, ha pembojehe’a kuaaitéva opa mba’e oporomonga’úva!
23. Peë pepoíva virúre iñañávagui,ha hembiapo vai’ÿvagui ndapeikuaaséi mba’eve!
Profeta Isaías ha’eva’ekue Ñandejára maranduhára ha he’iva’ekue ñembyasy ohupytytaha opaichagua tekove, umi ñemomarandu iporä jahechakuaa.
UMI IPYAGUASÚVA, umívape raëteve Isaías oñe’ë oguerehotaha ñembyasy. Profeta Isaías he’iva’ekue kóicha: “¡Cháke peë japúpe perotyryrýva pende reko aña ha pene rembiapo ahë, kárro ojererahaháicha!” Jahechakuaa ko’ä ñe’ë rupive oïha ipya’aguasúva ojapo haguä angaipa. Ha’ekuéra oikuaáramo jepe naiporäha japeka, ko’ë ko’ëre ojapo tembiapo vai okyhyje’ÿre. Oguerotyry tembiapo vai ára ha ára ojererahaháicha peteï kárro. Ha’ekuéra ovy’a hembiapo vai reheve. Ha ndohejaséi voi tembiapo vai ojapóva.
Péicha avei, oñe’ë vai Ñandejárare ha oñemoï hese. Ha’ekuéra he’i: “¡Tojapo pya’ékena Ñandejára upe he’íva ojapotaha jahecha haguä. Israel Jára Imarangatúva tohekombo’e roikuaa haguä!” Ha’ekuéra ndoikuaáiete voi Ñandejára rembipota. Ha katu, oñemohatä hape vaípe ojapo haguä upe ha’ekuéra ojaposéva.
Umíchagua tekove Ñandejára ojusgáta. Nde ikatu rehenói peichaguápe angaipa apoha ipy’aguasúva. Péichagua tekove oï Ñandejára hekojojáva poguýpe ha ikatu ja’e; peichagua tekove katuete oïva’erä Ñandejára poguýpe ipy’aguasúgui ha nahesa pirïri ojapo haguä tembiapo vai.
UMI OPOROMBOTAVÝVA, umíva niko umi moköiha tekove Isaías he’íva oguerekotaha ñembyasy. Umíva niko ombojehe’a iporäva ivaívare. Ha’ekuéra ndahe’ikuaái ha ndahe’imo’äi mávapa pe tape oï poräva. Profeta Isaías he’i ha’ekuéra ohenoiha upe ivaívape iporä, ha upe iporävape ivai. Omoambue oï poräva oï vaívare. Ombojehe’apa. Ombovaipa upe oï poräva ha omokyre’ÿ tembiapo vai apo. Ojapo pytügui tesape ha tesapégui ojapo pytü; iróvare he’i he’ëha; he’ëvare katu he’i iroha. Opa mba’e omoambuepa. Oporombotavy. Ha’ekuéra ndoikuaái. Ha oikuaáramo jepe, nomomba’éi upe oï poräva térä oï vaíva, tesape térä pytümby; he’ëva térä iróva.
Upéi katu ha’ekuéra voi oñemoherakuä ijupe. Profeta Isaías he’ive: “Cháke peë peimo’äva pene aranduha, pejéva pene akä poräha.” Ha’ekuéra oñe’ë porä ijehe ambuekuéra renondépe, he’ívo ijehe iñaranduha térä iñakä poräha. Oñembotavy pyre. Umíchagua Ñandejára ojusgáta. Ñandejára poguýpe oï peteïteï. Umi oporombotavýva oï Ñandejára poguýpe: umi ombojehe’áva upe oï poräva oï vaívare, tembiapo porä tembiapo vai reheve, omoambuepa oñemohenda haguä upe ha’ekuéra oipotaháicha. Ñande ja’ekuaa, ha’ekuéra oïha Ñandejára poguýpe, HA’E ojusgáta chupekuéra. Oï heta mba’e oïva hendápe porä ha akóinte katuete oï poräta. Umi ohenóiva mba’e poräme, mba’e vai, oñembotavy ha oporombotavy katuete. Umichagua oï Ñandejára poguýpe, Ha’e ojusgáta chupekuéra.
UMI OKA’ÚVA, ha’e mbohapyha tekove Profeta Isaías he’iva’ekue ohupytytaha ñembyasy heko vaíre. Umíchagua niko ohasa heta tiempo omboy’úvo opaichagua bebida alcohólica. Ehendumína, mba’éichapa profeta Isaías oñe’ë hesekuéra versículo 22pe: “¡Cháke peë, kaguy je’úpe napenderasaháiva, ha pembojehe’a kuaaitéva opa mba’e oporomonga’úva!” Ha’ekuéra ohasa heta tiempo omokövo. Ombojehe’a umi bebida irovéva ha oporomonga’úva. Upéicha ojapóvo ipu’akave ha osämbyhy iñapytu’ü.
Péicha avei ipojái virúre “soborno” rupive, versículo 23pe he’i kóicha: “Peë pepoíva virúre iñañávagui, ha hembiapo vai’ÿvagui ndapeikuaaséi mba’eve.” Umíchagua ojapóta oimeraë mba’e pirapire rehehápe, oguerekove haguäicha. Upekuévo omoherakuä tekojoja’ÿ. Hembiapo vai’ÿvagui ndoikuaaséi voi mba’eve.
Umi oka’úva, ipojáiva virúre “soborno” rupive, omboykéva tekojoja, ombojehe’áva bebida alcohólica umi irovéva. Umíva, oï Ñandejára juicio guýpe, HA’E ojusgáta chupekuéra”. ¡Cháke peë!”, he’i Profeta Isaías. Ikatu ja’e jajavy’ÿre, Ñandejára ojusgataha chupekuéra, oïgui ipo guýpe.
Jahechakuaa vove ko’ä ñembyasy térä jehasa’asy, jajuhu oïha voi sentencia juicio rehegua ko’äichagua tekovépe guarä ko yvy jerekuére. Taha’e ha’éva tetä, péichagua oï opa rupiete: ipy’aguasu ojapo haguä angaipa, nahesa pirïri ojapo haguä tembiapo vai, toiko oikóva hembiapo vai. Oï avei umi oporombotavýva ombojehe’áva opa mba’e porä mba’e vaíre. Ha umi oka’úva, ombojehe’áva bebida alcohólica irovéva ha omokyre’ÿ tembiapo vai apo. Ko’ächagua tekove ári ho’a ha ho’áta Ñandejára juicio. Ñandejára Imarangatúva ojusgáta ko’äichaguápe, peteïteïme.
Angirü che rendúva, nde ikatu ejehekýi ko’ä ñembyasy, jehasa’asy térä juicio gui, Jesucristo pytyvö rupive. Tekotevë rehechakuaa nde ha’eha angaipa apoha, ejerovia Jesucristo rehe, ejerure chupe taneperdona, eme’ë chupe nde rekove. Ha ejerure chupe tanepytyvö reheja haguä nde rape tuja. Upéicha rejapóramo, he’i Ñandejára Ñe’ë oikotaha ndehegui Ñandejára ra’y térä itajýra, ha ko’ä ñembyasy, jehasa’asy térä juicio ndaha’emo’äi nemba’erä.