Isaías 59:16-21
Kuimba’ekuéra ha kuñanguéra oñeha’ä oheka Ñandejárape ha’ekuéra oikuaaháicha, upéva niko ojehu ymaite guivéma ha avei opa rupiete ko yvy ape ári. Upévare niko heñói hetaiterei religión. Opaichagua temimo’ä térä jerovia omopyrenda umi religión. Tekovekuéra niko oikuaa oïha peteï Máva Ipu’akapáva (Ser Supremo). Opavave oikümby upeichaha. Oï katu ndogueroviaséiva, ha ombotovévo ohechauka oïha Máva Ipu’akapáva.
Ñande, tekovekuérava, jaikóvo tavakuérape, ñamoñepyrü opaichagua religión; hetaiterei niko oï ko yvy jerére ymaite guive. Opaichagua religión kuimba’ekuéra omoñepyrüva’ekue ohechauka pe añetegua ñemokarë. Umi religión-kuéra heñói, okakuaa ha oguereko ñemopyrenda ndaijeroviapýiva. Kuimba’ekuéra niko oñeha’ä oheka Ñandejárape.
Santa Biblia ohechauka ñandéve Ñandejára ha’eha upe ohekáva añetehápe kuimba’épe. Ñandejára oheka kuimba’ekuérape oiko porä jey haguä hendivekuéra. Upe jeiko porä osova’ekue Adán ha Eva naiñe’ërendúiramo guare Ñandejárape yvaty Edénpe. Upevarä ñaikotevë peteï Pysyröhára. PYSYRÖHÁRA PETEÏETE rehe oñe’ë ñandéve Ñandejára ñe’ë, Génesis guive, Apocalipsis peve. Jahechamína mba’épa he’i Profeta Isaías, capítulo 59, versículo 16 guive 21 peve. Upéva jajuhu Antiguo Testamentope ha he’i kóicha:
16. Ñandejára oñemondýi ohechávo ndaiporiha ko’ä mba’ére ojepy’apýva Upérö oipuru ipyapy mbarete, ha Ha’e voi hesekuéra opu’ä.
17. Ha’e omoï tekojoja ipyti’a mo’äha ramo ha iñakä ári omoï ivaívagui ñesë, akä mo’äha ramo. Oñemonde poromyengovia aópe ha pochy rendy ahojápe oñeñuä
18. Ñandejára omyengoviáta peteïteïme hembiapokuére. Hese ija’e’ÿvape oinupä pochýta, hese oñemoïvape oñeñandukáta. Tetä mombyryguápe omyengoviáta hembiapokuére.
19. Kuarahy reike guive ombyajéta hikuái Ñandejára réra, ha kuarahy resë guive ohecháta heko mimbipa; Ñanderuete Pytu Poräite ojeitýta hi’arikuéra ku ysyrýicha oky tuichaiterei rire.
20. Siónpe heko vaígui opoíva, Jacob ñemoñare heko pu’ägui ojehejáva, oúta oguenohëvo Ñandejára he’i péicha.
21. Kóva che ñe’ëme’ë pene ndive he’i Ñandejára: Che Espíritu ame’ëva’ekue ndéve, che ñe’ë amoïva’ekue nde jurúpe, ha ndo’amo’äi, nde juru ha ne ñemoñare jurúgui araka’eve, opa árape guarä.”
Ko ñamoñe’ëva’ekuépe jajuhu heta ñe’ë OHECHAUKÁVA ñandéve pe Pysyröhára peteïnte oïha.
PE MARANDU PORÄ PYSYRÖHÁRA REHEGUA ohechauka oïha temikotevë. Ñañepyrüvo ñamoñe’ë jajuhu ndaiporiha avave hembiapo poräva. Profeta Isaías he’i Ñandejára omañahague ha ndojuhúi hekojojáva avei ohecha ndaiporiha avave ojepy’apýva ni oñemoïva umi mba’e vai ojejapóvare. Upéva naiporäiete voi. Ndaipóri avave, ni peteï oñeha’äva ohesape’a kuimba’ekuérape rembiapo vai rehe. Avavete noñeha’äi ojapo Ñandejára rembipota.
Ehechakuaamína pe versículo he’ihápe: “upérö oipuru ipyapy mbarete, ha Ha’e voi hesekuéra opu’ä.” Peteï tenda gotyo añónte ikatu ojeho. Peteï tape añónte oï ojeho haguä hese. Ndaipórigui avave, ni peteï kuimba’e ohekáva Ñandejárape, upémarö Ñanderuete oipuru ipyapy mbarete ha Ha’e voi hesekuéra opu’ä. Angirü che rendúva, Ñandejára voi ome’ë ñandéve ñane Pysyröhárarä ndaipo´rigui ambue tape.
Pe marandu rupive jaikuaa mba’éichapa oñemonde, mba’eichagua aópa oguereko. Ha’e oguereko tekojoja ipyti’a mo’äha ramo. Iñakä mo’äha ramo oguereko angaipágui ñesë. Oñemonde poromyengovia aópe ha pochy rendy ahojápe oñeñuä. Ko’ä mba’e omombe’úva ñandéve ohechauka pe Pysyröhára Ipu’akapaha! Eñe’imaginamína: pyti’a mo’äha tekojoja, akä mo’äha pysyrö, ijao poromyengovia ha ijahoja pochy rendy. Chéverö guarä Profeta Isaías oñe’ëma upérö Jesucristo, Ñandejára Ra’ýre, ha’e añoite upe ikatúva oporosalva, Ha’e niko pe Pysyröhára, ndaipóri ambue.
PYSYRÖHÁRA REMBIAPOTEE ohechauka ñandéve mba’éichapa ojapóta. Profeta Isaías he’i: “Ñandejára omyengoviáta peteïteïme hembiapokuére.” Pe Pysyröhára rembiapo oñemopyrenda tekojojápe. Ha’e omyengoviáta kuimba’ekuérape hembiapokuére, peteïteïme. Upévare, hese ija’e’ÿvape oinupä pochýta ha hese oñemoïvape oñeñandukáta. Ndaiporimo’äi okañýtava chugui. Ñandejára omyengoviáta opavavetépe, Ha’e hekojojágui.
Tenondeve, la Biblia ñanembo’e hesakä haguäicha ñandéve, avavete nomomba’eiha Ñandejárape. Ñanderuete ojapo upe ojapova’eräva. Ha’e osämbyhy tekojoja opavavete ndive. Chéverö guarä, upéva ha’e Pysyröhára rembiapotee.
Oñemopyrendávo tekojoja rehe, upe osëtava ha’éta momba’eguasu. He’i Profeta Isaías: “Kuarahy reike guive ombyajéta hikuái Ñandejára réra, ha kuarahy resë guive ohecháta heko mimbipa.” Pysyröhára ojapóta hekoitépe opaite mba’e, upévare opavave oikuaáta Ha’e hekojojaha: “Kuarahy reike guive ombyajéta hikuái Ñandejára réra, ha kuarahy resë guive ohecháta heko mimbipa”. Maymáva omomba’eguasúta Pysyröhárape, ha’e añoite ikatúgui ñane pysyrö.
Ha’e omoïta ipoguýpe umi ndohayhúivape chupe. Oúramo umi ija’e’ÿva ysyry hatäicha, profeta Isaías he’i: “Ñanderuete Pytu Poräite ojeitýta hi’arikuéra ku ysyrýicha oky tuichaiterei rire.” Ha’ete ku Ñandejára Espíritu omoï ramo guáicha peteï señal ojepyta haguä he’íva ¡Ani ehasa! Ñandejára osämbyhýta ija’eÿvape. Ñandejára Pytü Poräite Ipu’akapa, ndohejareimo’ä mba’eveichagua tembiapo vai.
Jesucristo, Ñandejára Ra’y añoite ikatu ome’ë pysyrö, ndaipóri ambue. Ha’e añoite oisämbyhýta tekojoja reheve. Angirü che rendúva, iporä hesakä ndéve, Jesucristo, Ñandejára Ra’y Hekojoja, ha’e añoite ikatu oisämbyhy tekojoja reheve. Ha’e añoite niko Pysyröhára, ndaipóri ambue.
PYSYRÖHÁRA OÚTA HA OPAVAVE OHECHÁTA CHUPE omombe’u ñandéve tenda, máva rendápe ha maeräpa. He’i profeta Isaías: “Siónpe heko vaígui opoíva, Jacob ñemoñare heko pu’ägui ojehejáva, oúta oguenohëvo Ñandejára he’i péicha.” Maymáva ojeroviáva Jesucristo rehe oha’arö ijeju ojehechaukávo Jerusalénpe. La Biblia, ambue hendápe, omyesakä upe Isaías ohaiva’ekue: “Oúta Pysyröhára Sionpe.”
Profeta Isaías he’iva’ekue Pysyröhára outaha umi heko vaígui opoíva, Jacob ñemoñare heko pu’ägui ojehejáva rendápe. Pe tenda héra Jerusalén ha umi tetägua ohechakuaáva hembiapo vai, umi ohekáva Ñandejárape, umíva rendápe oúta.
Maeräpa oúta jajuhu avei. Pysyröhára oúta ombopyahu haguä ñe’ëme’ë ome’ëva’ekue hetäguáme ha omoingo porä jey haguä hendive hetägua. Umi ñe’ëme’ë omoïva’ekue profeta jurúpe, ndo’amo’äi ijurúgui ni iñemoñare jurúgui araka’eve ha’égui opa árape guarä. Mboy tiempo oïta? Opa árape guarä, he’i Ñandejára. Ñanderuete oipysyröta hetäguáme ha ome’ëta chupekuéra ñe’ëme’ë ndo’amo’äiva araka’eve, ha’égui opa árape guarä.
Jesucristo, Ñandejára Ra’y añoite, ikatu ome’ë pysyrö, ndaipóri ambue.
Ko ohaiva’ekue profeta Isaías ha ñamoñe’ëva’ekue ko árape ohechauka ñandéve Jesucristo, Ñandejára Ra’y ha’eha Pysyröhára, ha’e añoite ndaipóri ambue. Oïva’ekue marandu porä omysakäva Ha’e añoite ikatuha ome’ë pysyrö; omombe’u ñandéve hembiapotee, ha’énte ikatúva ojapo; avei omombe’u ñandéve peteï ára ou jeytaha, opavave ohecháta chupe.
Angirü che rendúva, romokyre’ÿ rejerovia haguä Jesucristo rehe, toiko chugui ne Pysyröhára, nde Salvador Personal. Ejerure chupe tanepysyrö, taneperdona ha tanepytyvö ko’ë ko’ëre.