Oikóva Tape Vaíre Nehenói

hft guarani 2022
Hope for Today (Guarani)
Oikóva Tape Vaíre Nehenói
Loading
/
Isaías 1:1-9

La Biblia niko Aranduka ijojaha’ÿva. Yma guaréma, ha katu, imbo’epy añetegua opa árape guarä. Aguerovia Espíritu Santo osämbyhyhague umi ohaiva’ekue la Bibliape. Hetaiterei arýma ohasa ha’ekuéra ohaihague umi ñe’ë, upéichavéramo jepe ko’ágä peve Ñandejára ñe’ë naiñambuéi. Umi haihára ha’eva’ekue kuimba’e ñandeichagua. Ñane remikotevë peteïcha meme ha Ñandejára peteïnte. Ñandejára Espíritu Santo peteïnte, upévare la Biblia ñanemba’eräite avei.

Añepyrühína mbo’epy Profeta Isaías rehegua oïva Antiguo Testamentope. Profeta Isaías oikova’ekue 700 año Cristo onase mboyve, upévare umi ñe’ë ha’e ohaiva’ekue oguerekóma hetave 2500 año-gui. Jahecháta umi ñe’ë ko’ágä guarä gueteri; opavave remikotevë ha’e peteïnte ha Ñandejára ñemyatyrö peteïnte ha upéichata akóinte. Amoñe’ë jeyjey vove la Biblia ajuhu momarandu oïva ipype oñe’ë chéve ha aha’arö nde avei rehechakuaa nemba’eräha avei, oñe’ëgui ñane korasöme.

Ñandejára ñande apova’ekue opavavépe jaikuaa haguäicha chupe. Maymáva Ñandejára apohare apytépe, ñande añoite ikatu jaguereko comunión hendive, jaikuaa chupe. Ambuekuéra Ñandejára rembiapo, mymbakuéra, ojapo upe ojapova’eräva. Ha’ekuéra oiko peteï hendáicha meme. Guyrakuéra ojehaitypo peteï hendáicha meme. Mymbakuéra oguereko upe ojapova’erä katuete. Ñandejára nañandeapói mymbakuéraicha. Ha’e oipota peteïteï jaikuaa chupe.

Jaikuaa vove Ñandejárape jaguereko py’aguapy ha’e omoïva ñande pype. Ñandehegui oiko peteï hendive. Ojeka vove upe jegueraha porä, ou problemakuéra oñeñandukuaáva ñande retepýpe ha osë oka gotyo avei. Umi problema ojehu opa rupiete ñamboykégui Ñandejárape ñande rekovégui, ndajajogueraha poräi hendive. Ñañemoï porä jey vove Ñandejára ndive upéva ogueru py’aguapy ha omoambue ñande rekove. Nde rehe avei ikatu ojehu upéicha ha maymávare.

Isaías capítulo 1, versículo 1 guive, 9 peve, Antiguo Testamentope jajuhu Profeta ohaiva’ekue pe jeiko vai rehegua. Upéva ha’e OIKÓVA TAPE VAÍRE ÑEHENÓI.

1. Umi mba’e Isaías Amós ra’y ohechava’ekue, Judá ha Jerusalén guigua, Judá ruvichaguasukuéra Uzías, Jotam, Acaz ha Ezequías oisämbyhýramo guare.

2. Yvága ha yvy, pehendu ko he’íva Ñandejára: “Amongakuaa mitänguéra tuichapa peve, ha’ekuéra katu opu’a che rehe.

3. Buey oikuaa ijárape ha vúrro ijára róga. Israel katu ndoikuaái, che retägua ndahechakuaái”.

4. ¡Ha, tekove äge, vai memetégui pene renyhëva! ¡Mba’e vai apoha ñemoñare, itujupáva ra’yre! Pejeiva’ekue Ñandejáragui, pe’apo’i Imarangatúva Israel Járape, peñemomombyry chugui.

5. Peë pejetu’u ivaívare, pende retépe nahembyvéima peñenupä haguä, kandu ha jekakuégui pene akä henyhëte, pende kuepa ha pene kangypáma.

6. Pene pysä apÿigui pene akä mbyte peve, ndaipóri hesäiha pende rete; ñehunga, ñenupängue ha ai huguypáva memete, avave oipohano’ÿ ha ojokua’ÿva, mba’eveichagua pohäme oipichy’ÿva.

7. Pene retägui oiko yvy ojeiko’ÿha, pende tavakuéra tata mante ohapy. Pende resa renondetépe, pende rayhu’ÿva oñemomba’e pende yvýre. Opa mba’e opyta mba’eve’ÿre Sodóma oñehundíramo guaréicha.

8. Ha pe táva guasu Sión opyta oga’i parral týpe, ogaguy rei kokuerépe ha táva ñoräiröme oñemongorávape guáicha.

9. Ñandejára Ipu’akapáva ndohejái rire mbovymi ore apytégui, ropytava’erämo’ä Sodoma ha Gomorra opyta haguéicha.

Isaías oñe’ëvo Ñandejára ñe’ëme omboysýi mba’éichapa upe oikóva tape víre, ojejevy jey haguä.

MITÄNGUÉRA OÑEMOÏVA HA OPU’ÄVA, upéicha pe oikóva tape vaíre. Profeta Isaías ojerure yvága ha yvýpe tohendu upe he’íva. Ha’ete ku avave nohendúiva. Gentekuéra nohenduvéi. Nohenduséi Ñandejára momarandu, ha upévare profeta Isaías he’i yvága ha yvýpe tohendu, Ñandejára oñe’ëguima. Upéi he’ive: “Amongakuaa mitänguéra tuicha peve, ha’ekuéra katu opu’ä che rehe.” Ohechauka ñandéve mitänguéra naiñe’ërendúiva ha opu’äva Ijapoharére.

Upémarö Profeta Isaías ombojoja mymbakuéra ha tekovekuérape. He’i pe guéi oikuaaha ijárape ha pe vúrro oikuaa ijára róga. Ko’äva ha’e mymba umi oikova’ekue Isaías tiémpope oipuruva’ekue mba’aporä kokuépe.

Pe guéi oikuaa porä ijárape ha pe vúrro oikuaa porä moöpa ohova’erä okaru haguä. Profeta Isaías he’i mitánguéra ñe’ërendu’ÿ ha’éva hetägua ndoikuaái Ijárape.

Jahechamína: mba’érepa ndoikuaái Ijárape? Térä mba’ére ndoikuaaséi chupe? Che ha’e jey ndoikuaaseiha Ñandejárape. Tetägua rebelde ndoikuaaséi. Ko’ápe oñe’ë ñandéve mitänguéra opu’äva Ñandejárare. Hetägua ikorasö atä, noñemoväiva mymbakuéra ñaröicha. Oñe’ëvo mitänguéra opu’äva Ñandejárare, ha’e ñehenói opavave oikóva tape vai rehepe guarä.

TEMBIAPO VAI APO MEMETE, omyesakä ñandéve mba’éichapa tekovekuéra peteïtteï. Profeta Isaías he’i maymávante hembiapo vaiha ohejágui Ñandejárape. Ñamoñe’ëmína pe versículo4:”¡Ha, tekove ahë, vai memetégui pene renyhëva. Mba’e vai apoha ñemoñare, itujupáva ra’yre!Pejeiva’ekue Ñandejáragui, peapo’i Imarangatúva Israel Járape, peñemomombyry chugui.” Tembiapo vai apo isarambi pya’eterei mba’asy vaícha, opavave pya’eterei oñemombyry Ñandejáragui ha mba’e vai mante ojapo. Upekuévo ogueraha hapykuéri opavave hapicha ojuhúvape hapére. Péichagua ndovy’ái voi ndohechái aja hapichakuéra hembiapo vaívo avei.

Tekovekuéra oñemohatä tembiapo vaíre, ojogua mba’asy okuera’ÿvaicha. Profeta Isaías he’i: “Pende retépe nahembyvéima peñenupä haguä…” Heta jehavira ohupytýma Isaías retägua, upeichavéramo jepe, naiñe’ërendúi. Ohupytyvéramo jehavira, oñemohatävétante hikuái hembiapo vaípe.

Profeta Isaías he’i: “Pene pysä apÿigui pene akä mbyte peve, ndaipóri hesäiha pende rete; ñehünga, ñenupängue ha ai huguypáva memete, avave oipohano’ÿ ha ojokua’ÿva, mba’evéichagua pohäme oipichi’ÿva”. Hasyvaipaite ha oikotevë ñepohäno.

Péicha oï opavave ndojeroviáiva Ñandejárare. Peteïtei jaikuaa ko yvy ape ári opaite mba’e ojejapoha hendape’ÿ. Upévare oñehenói opavave oikóva tape vaíre ojevy haguä Ñandejárape.

TETÄ OÑEMBOYKÉVA omombe’u ñandéve mba’épa ojehu tetägua oikóva tape vaíre. Ha’e tetä ambue tetägua ouva’ekue oñemomba’e hese, upekuévo ohundi opaite mba’e oguerekóva ipype ha oguerahapa mba’e porä oguerekomíva ipype. Péicha avei ojehapy ogakuéra ha ñemitÿnguéra oñemoperö, upéicha ojapo umi oúva oñemomba’e távare. Umi oikóva pe távape ndaipu’akái hesekuéra, ndocha’éiva hesekuéra oúgui hetaheta ha ñehundi mante oheja hakykuere. Ñembyasy ogueru ko’ä mba’e.

Isaías ohaive ha he’i pe táva guasu Sión opytahague oga’i parral týpeguáicha ha ogaguy rei kokuerépe. Oñemba’apopa rire parral týpe, ojeheja peteï oga’i yvytu oity haguäicha upéi. Upéicha avei óga kokuépe oïva opyta rei ha ojogua táva ñorairöme oñemongorávape guáicha. Naiporäiete umi óga upéicha opytáva, nandirei, ndaipóri avave oñangarekóva hese, ama térä yvytu atä ohundi haguäicha opyta.

Jajuhu mba’e porä versículo 9pe he’hápe:”Ñandejára Ipu’akapáva ndohejái rire mbovymi ore apytégui, ropytava’erämo’ä Sodoma ha Gomorra opyta haguéicha.” “Ñandejára Ipu’akapáva”. Angirü che rendúva, ko’ä ñe’ë iñimportanteterei, ñane mbo’e ÑANDEJÁRA poriahurereko. Ñandejára poriahurereko ohupyty opavave oikóva tape vaíre. Oñe’ë ñandéve tetä oñemboykévare, ha upéi ohupytýva Ñandejára poriahurereko.

Opavave tekove oikóva tape vai rupi tekotevë ohendu ha oikuaa “Ñandejára Ipu’akapáva” ohayhu ha oiporiahurerekoha chupe, ome’ëse chupe pysyrö ojeroviárö hese.

Isaías ohai ha omombe’u ñandéve tembiasa ijetu’úva. He’i ñandéve Ñandejára oipotaha opavave oikóva tape vaíre oheja hembiapo vaikue. Isaías ohai: mitänguéra oñemoïva ha opu’ävare, tembiapo vai apo memete rehe ha tetä oñemboykévare. Iporä ñanemandu’a pe versículo 9pe he’ívare: “Ñandejára Ipu’akapáva”. Ha’e añoite ñane pytyvökuaa. Ñandejára ñanderayhu, ñande poriahurereko. Opavave oúva hendápe, ojeroviáva hese oguerekóta pysyrö opa árape guarä ha py’aguapy ijojaha’ÿva Ñandejára añoite ome’ëva. Upévare, angirü che rendúva romokyre’ÿ eñemboja haguä Ñandejára rendápe ko árape voi.

Receive Weekly Encouragement

Sign-up to get a sermon straight to your inbox on a weekly basis!