Isaías 9:1-7
Oï ningo mymbakuéra omba’ejukáva pyharekue. Umíchagua mymba oguerohory pytümby. Oike vove kuarahy ha pytü ñepyrü, umi mymba osë ikuarakuéragui ha oho ojeporeka hembi’uräre.
Jesús omombe’uva’ekue oïha kuimba’ekuéra ohayhuvéva pytümby tesapégui. Jesús he’iva’ekue umi kuimba’e oguerohoryveha pytümby hembiapokuéra naiporäigui. Ha’ekuéra oimo’ä hendape’ÿ pytümby omo’ätaha hembiapo vaikuéra, oimo’ä avei avave ndohechamo’äiha chupekuéra.
Opavave tekove ningo ovy’ave oïhápe tesape. Ko’yteve ndajaikuaái vove mba’épa oï pytümbýpe jaheka tesape. Ndajaikuaái vove mba’épa ojehúta ndajavy’ái. Maymáva javy’ave oïhápe tesape.
Ndajaguerohorýi avei jepy’apy. Ndajavy’ái jaguereko jave problema. Jaguerekose säso. Péichava’ekue akóinte tekovekuéra ndive ko yvy ape ári. Ñandejára ohechakuaa ñane remikotevë ha ñane pytyvökuaa. Upevarä Ñandejára ome’ëva’ekue Máva ikatúva ñane pytyvö. Ha’e añoite upe ñane pytyvökuaáva ñamboyke haguä pytümby ha jepy’apy. Antiguo Testamentope, Profeta Isaías oñe’ë ñandéve Hese, capítulo 9, versículo 1 guive 7 peve, upépe he’i:
1. Tetägua oikóva pytümbýpe, ohecha peteï mba’e rendy tuicháva; umi pytümbýpe oikóva ári, ohesape upe mba’e rendy, ku jepy’apy vevúicha ou ypyva’ekue Zabulón ha Neftalí retäpy rehe; ipahápe ijyvy omyenyhëta tesape tuichágui, Jordán mboypýri guive yguasu peve.
2. Pe tetä oikóva pytümbýpe ohecháta tesape nde tuicháva, umi oikóva ñemano ypýpe ohecháta ára sakä ohesapéva hi’ári.
3. Emboheta hetavéta tetäyguakuéra ha embovy’aitéta chupekuéra. Ovy’a joáta hikuái ne renondépe ku ovy’a ramovaicha kóga ra’ÿi oñemono’öha árape, ku hory joaháicha soldadokuéra omboja’o jave umi mba’e oguerumava’ekue ambue tetägui.
4. Nde remopëgui pe kangálla pohyietéva, pe yvyra puku ijati’y ári, ha ijopyhára tukumbo ku Madián árape guáicha.
5. Ojehapypáta soldado sapatukuéra, ha ahojakuéra ojehypýiva tuguýpe opytáta tata rembi’urä ramo.
6. Peteï mitäkuimba’e onaséta ñandéve ko yvy apére, peteï ta’ýra oñeme’ëta ñandéve, ha ijati’y ári oïta mburuvicha pu’aka, ha oñembohérata ichupe: Mbojovakehára hekopeguáva, Jára Ipu’akapáva, Ipy’aguasúva, Ñandejára tapia guaräva, ha Mburuvicha Py’aguapy reheguáva.
7. Hetä pu’aka ituichaiterei ha ipy’aguapy nda’ijapyramo’äi, Ha’e oguapýta David guapyha guasu ári ha Ha’e oisämbyhýta hetäme, oguenohëvo oimeraëvape tape poräme ha ombojovakéta hekoitépe, upe ára upéva guive opaite ára peve guarä, yvága apykuéra Jára, ojapopáta ko’ä mba’e.
Angirü, pytümby tuichaitereíramo ha jepy’apy ipohyietereíramo jepe, umíva ohasapáta ÑANDEJÁRA IPU’AKAPÁVA PYTYVÖ rupive
TESAPE OJAJÁIVA ha’e pytyvö Ñandejára ome’ëva ñandéve ñahenonde’a haguä pytümby ha jagueropu’aka haguä jepy’apy. Ko versículo oñepyrü omombe’úvo oïhague tetä oikóva pytümbýpe ha upekuévo ohasa: jepy’apy vai, jahéi ha jeha’asy nde tuicháva. Jehasa’asy ouva’ekue Isaías retägua ári, ha’ekuéra ohejágui Ñandejárape ha oiko japu rapykuéri. Yvy Zabulón ha yvy Neftalí ha’eva’ekue tenda Tierra Santa pegua, ymaite profeta Isaías oikóramo guare.
Pytümby oñemohenda ijapytepekuéra. Israelitakuéra oñemohenda umi yvýpe, oïhápe mano kuarahy’ä. Ha’ekuéra oguatava’ekue tape iñipytüva rupi ohejágui Ñandejára Ñe’ë añeteguáva.
Upémarö Profeta Isaías he’i ouha mba’e rendy nde tuicháva, Ñandejára resape ojajaipáva ojehechauka. Ha’ekuéra ohechákuri tesape nde tuicháva. Upe tesape omimbiva’ekue avei umi oikóva yvy oïhápe mano kuarahy’ä. Omimbi ha ohesape ohechauka haguä tape añeteguáva. Omimbi oguenohë haguä chupekuéra pytümby oïhágui. Pe tesape omimbi jave, pytü oho. Jesús he’iva’ekue umi oïvape ijerére: “Che hína yvypóra resapehára. Pe che moirüva oguerekóta tesape oporomoingovéva, ha ndoikomo’ävéima pytümbýpe.” Tesape jajaipáva! Ñandejára resape oporohesape’áva ha’e pe tesape ojajaipáva.
SÄSO IJOJAHA’YVA ou Ñandejáragui umi ojepy’apýva ha ohasa’asývape guarä. Jepya’py ha jehasa’asy ningo opavavépe oguereko’asy. Pe versículo 4 pe oje’e mávapa ha’eve’kue upe ombohasa’asyva’ekue israelitakuérape. Ha’ekuéra ohasa’asyva’ekue ohejágui Ñandejárape. Oñe’ë ko’ápe kangálla pohyietévare, yvyra puku ati’y ári, tukumbo ha carga pohyietére, ikatúne oñe’ë ñandéve israelitakuéra oikóramo guare tembiguáicha rehe.
Upéi, iporä jahechakuaa oïha vy’a ha tory. Oiko raëva’erä ñorairö ha apañuäi, oñeñe’ë soldado sapatukuérare ha ahoja ojehypýiva tuguýpe, péicha avei ojehapypáta kapi’i okaiháicha tatápe. Upeichavéramo jepe, upéi oïta vy’a ha tory. Oïta avei säso ijojaha’ÿva, iporäitéva. Versículo 3pe, Ñandejára oñe’ë kuimba’ekuéra ovy’ataha omono’ö ramoguáicha kóga ra’ÿi, ha omboja’o jave umi mba’e ojegueruva’ekue ambue tetägui. Oïta säso ojehupytýva oñehundígui tembiguái reko, ojeipe’áta pe mba’e pohýi ojegueraháva ha opáta upe jopyhára tukumbo. Upe säso ijojaha’ÿta. Upéva he’iva’ekue profeta Isaías hetäguáme upérö guarépe.
Jesús oñe’ëva’ekue säsógui avei. He’iva’ekue: “Ta’ýra penemosäsóramo, añetehápe peë penesäsóma.” Upéva niko pe säso ijojaha’ÿva, oikuave’ëva opavavépe Ñandejára Ipu’akapáva jajeroviávo Jesucristo rehe.
ÑANDEJÁRA IPU’AKAPÁVA ohechauka ñandéve imborayhu ijojaha’ÿva ñane guenohë haguä pytümby ha jejopy vaígui. Ko’ápe oï Ñandejára Ñe’ë tekotevëva ñaikümby: hesakäva’erä opavavépe. Ko versículo 6pe oñe’ë ñandéve peteï ta’ýra rehe: “Peteï mitäkuimba’e onaséta ñandéve ko yvy apére, peteï ta’ýra oñeme’ëta ñandéve.” Mba’e terakuérapa oguereko? Jahechamína: “Oñembohérata ichupe: Mbojovakehára hekopeguáva, Jára Ipu’akapáva, Ipy’aguasúva, Ñandejára tapia guaräva, ha Mburuvicha Py’aguapy reheguáva.” Ko mitä katuete Ñandejára Ra’y. Mba’eichaitépa imarangatu Ñandejára ome’ëgui ñandéve máva ñaneguenohëtava pytümby ha angaipágui.
Pe mitä ouva’ekue peteï tiémpope, ha ouva’ekue ojapo haguä Ñandejára rembipota. Jahecha jeymína mba’épa he’i pe versículo 7: Oisämbyhy vove oïta py’aguapy. Upe ñesämbyhy ha py’aguapy ndaijapyramo’äi, ndopamo’äi. Oguapýta David guapyha guasu ári. He’i Isaías 9:7pe: “Ha’e oguapýta David guapyha guasu ári ha Ha’e oisämbyhýta hetäme”. Ha’e oisämbyhýta tekojoja reheve “upe ára upéva guive opaite ára peve guarä.”
Ambue mba’e jajuhúva avei versículo 7pe iñinteresánte ha iñimportante jahechakuaa he’ihápe: “yvága apykuéra Jára, ojapopáta ko’ä mba’e.” Upéva hesakä porä ñandéve. Ñandejára Ipu’akapáva oguerúta Ita’ýra ojapótava hembipota Ha’e he’iháichaite, ha oikopáta upe Profeta Isaías he’iva’ekue hese. Profeta Isaías, ha’eva’ekue Ñandejára momaranduhára, omombe’uva’ekue umi mba’e ojehútava opa haguä pytümby ha jepy’apy vai.
Tesape jajaipáva oguahëta opavave oïva guive pytümbýpe. Säso ijojaha’ÿva ohupytýta opavave ohasa’asýva ha oiméva jejopy vaípe. Ñandejára IPu’akapáva ojapopáta umi mba’e he’íva guive iñe’ëme ojapotaha pe mitä ha Ita’ýra rehegua. Upévare angirü che rendúva ejerovia JESUCRISTO rehe, eme’ë chupe nde rekove, tove tome’ë ndéve pysyrö, taneguenohë pytümby reimehágui ha tome’ë ndéve pya’guapy Ñandejára ndive añetehápe reikotevëva.