Ñandejára Ipu’akapáva

hft guarani 2022
Hope for Today (Guarani)
Ñandejára Ipu’akapáva
Loading
/
Isaías 40:6-12

Oï ningo opaichagua religión. Umi religión oguereko katuete máva oñemomba’eguasúva. Heta jey omomba’eguasu ta’angápe. Ha omomba’eguas umi ta’angápe okyhyjégui ipochy ramo guarä hendivekuéra. Ha oï ningo avei ta’anga opaichaguáva, oï ivaietereíva voi. Umi ta’anga ningo gentekuéra ojapo, ha upéi ha’ekuéra okyhyje upe ojapova’ekue ipo rupivégui.

Péicha avei, oï heta ojavýva upe opensaháicha Ñandejárare: oimo’ä Ñandejára oïha okastiga haguänte tembiapo vai. Ojeroviáva Ñandejárare oikuaa porä Ha’e Hekojojaha, avei ohepyme’ëtaha hembiapo vaívape katuete. Upekuévo avei, la Biblia omombe’u ñandéve Ñandejára ha’eha Túva Marangatu ñanderayhúva. Ñambyasy ningo heta tuvakuéra ko yvy ape arigua ndojapói upe ojapova’erä ita’yrekuérare, ha katu, Ñandejára imarangatu, ñande rayhu ha oñangareko ñande rehe. Ha’e niko Túva Yvagapegua, ñanderayhúva, ndaha’éi mburuvicha iñañáva

La Biblia avei omombe’u ñandéve Ñandejára Ipu’akapaha, ha oguerekoha opaite mba’e ipo guýpe. Oï heta mba’e ndaikatúiva ñaikümby Ñandejáragui. La Biblia ñane mbo’e avei tekotevëha ñamomba’eguasu chupe ha ñane py’amirïva’erä henondépe, Ha’e Imarangatúgui ha Ipu’akapágui.

Profetakuéra Espíritu Santo rupive omombe’u ñandéve heta mba’e Ñandejára rehegua. Isaías capítulo 40, versículo 6 guive 12 peve, oïva Antiguo Testaméntope, jajuhu oñe’ëhápe ñandéve ÑANDEJÁRA IPU’AKAPÁVA rehe:

6. Oï he’íva: “Ere hatä” Ha che ha’e: “Mba’e piko ha’e hatäva’erä?” Opa yvypóra kapi’ícha ha yvoty ñúicha hekove.

7. Pe kapi’i ipiru, haviru pe yvoty Ñandejára oipejúramo hi’ári. Yvypóra niko añete pe kapi’ícha.

8. Pe kapi’i ipiru, haviru pe yvoty, Ñandejára ñe’ë katu opyta opa árape guarä.

9. Ejupi yvyty yvatetépe, nde reraháva Siónpe marandu porä. Hatä esapukái, nde, reraháva marandu porä Jerusalénpe. Esapukái kyhyje’ÿre, ere Judá pegua tavakuérape: ¡Péina upéve pende Ruete!

10. Oguahëma Ñandejára Ipokatu reheve ha pyapy mbaretépe opa mba’e ipoguýpe omoï. Ogueru hendive yvy arigua rembiapo repyrä ha hetäyguakuéra oguata henonderäme, Ha’e omyengoviáta hembiapokue oihäichaite.

11. Ovecha rerekuáicha ogueraha ijovechakuéra omongarúvo, ohupi umi ovecha ra’y, ogueraha ijyva ári ha oñangareko ovecha imemby ramóvare.

12. Máva piko oha’ära’e umi yguasu ipo mbytépe, térä ikuäme yvága pukukue ha ipekue? Máva piko omoïra’e mba’e ra’äme yvy arigua yvy? Máva piko oha’ära’e yvytykuéra, ha yvy pu’änguéra?

Angirü che rendúva, ko’ä versículo rupive ñahesa’ÿijóta mba’épa he’ise ñandéve Profeta Isaías Ñandejára Ipu’akapáva ha Ijojaha’ÿva rehe.

EHECHAKUAA IÑE’Ë IJOJAHA’YVA. Jajuhu oñepyrüvo ko versículo 6 oñe’ëha opa yvypórape, kuimba’e ha kuñáme oñe’ë. Profeta Isaías ohendu ñe’ë he’íva chupe: “Ere hatä.” Ha Isaías ombohovái: “Mba’e piko ha’e hatäva’erä?” Upe ñe’ë ombohovái chupe: “Opa yvypóra kapi’ícha ha yvoty ñúicha hekove.” Ñandejára oikuaa porä mba’épa ñande. Ha’e oikuaa porä mba’éichapa ñande. Ha’e oikuaa ñande rekove ndahi’areiha, ojogua pe yvoty ñúme guáicha, ipoty pyhareve ha ka’aru guarä ikangypaitéma.

Isaías ohai kóicha: “Pe kapi’i ipiru, haviru pe yvoty.” Jaikuaa niko kapi’i pya’e ipiru, ndoiko aréi. Ou yvytu aku ha ojope kuarahy aku ha ka’avo pya’e ikangy ha
ipiru. Upéicha profeta Isaías he’i ha’eha maymáva yvypóra rekove.

Ñandejára ñe’ë katu, he’i Isaías, naiñambuéi araka’eve. He’i Isaías: “Ñandejára ñe’ë katu opyta opa árape guarä.” Ñandejára ñe’ë niko oïta opa ára. Ndaha’éi yvoty ñúme guáicha. Ndaha’éi yvyporaicha oúva ha ohóva. Nahániri, pe yvytu aku ni mba’eve nomoambuemo’äi Ñandejára ñe’ë araka’eve. Ñandejára ñe’ë oïta ha opytáta opa árape guarä. Ñandejára ñe’ë naikangýi, naiñambuéi ni nomanomo’äi araka’eve. Túva Ñandejára ñe’ë opyta opa árape guarä. Tekotevë avei jahechakuaa Ñandejára ñe’ë ipu’akaha.

EHECHAKUAA IMBA’E PORÄ IJOJAHA’YVA. Ehechakuaamína mba’éichapa Ñandejára ohenói Siónpe. Sión niko ko’ápe Ñandejára retägua, Isaías retägua, gentekuéra Ñandejára mba’éva. Siónpe oje’e ojupi haguä yvyty yvatépe, oheka haguä tenda yvate ikatutahágui oguerosapukái momarandu, upe tenda guive oñe’ë haguä Ñandejára rembiapo, iporiahuvereko ha imborayhu rehe. Ha’e ogueru mbarete Jerusalénpe. Sión ha Jerusalén niko peteï tendánte. Jerusalén rehe Profeta Isaías he’i: “Ejupi yvyty yvatetépe, nde reraháva Siónpe marandu porä. Hatä esapukái, nde, reraháva marandu porä Jerusalénpe.” Ojerure oñe’ë hatä haguä, tosapukái voi. He’ive: “Esapukái kyhyje’ÿre, ere Judá pegua tavakuérape: ¡Péina upéve pende Ruete!!”

Iñimportante chupekuéra guarä ohendúramo guare Profeta Isaías ñe’ë he’i vove chupekuéra Ñandejára momarandu. Ñandejára osämbyhyha. ÑANDEJÁRA ipu’aka rupive oisämbyhy. Opaite mba’e oguereko ipo guýpe. ÑANDEJÁRA oúta pyapy mbarete reheve. Ipyapy mbarete reheve oisämbyhýtal. Ha’e oúta ohepyme’ë haguä opavavépe hembiapokue rehe. Ha’e oikuaa porä mba’épa ha mba’éichapa ojapóta. Oguerúta hendive hetägua oguenohëva’ekue jejopy vaígui.

Ñandejára ha’e Sämbyhyhára Ipu’akapáva hetäguáme guarä. Ñandejára pu’aka ojehechakuaa avei oñangarekóvo hetäguáre. Ñandejára niko Iporiahuvereko ha Ipy’a porä. Ha’e niko oñangareko kunu’u reheve umi ikangývare, umívape Isaías ohenói ovecha ra’y. Ñandejára oñangareko hetäguáre, ovecha rerekua oñangarekoháicha ijovechakuérare. Ovecha rerekua oñangareko ovecha ra’ykuérare ha oñangareko hesekuéra anítei iñembyahýi, okañy térä ikane’öiterei. Ohupi ovecha ra’ykuérape ijyva ári.

Ovecha rerekuáicha Ñandejára omongaru hetäguáme ha oñangareko ikangývare. Ha’e oikümby hemikotevë, avei ovecha rerekuáicha oñangareko ovecha imemby ramótavare. Ovecha rerekua oikuaa mba’éichapa oñangarekova’erä ijovechakuérare. Péicha avei Ñandejára oikuaa porä mba’éichapa oñangarekova’erä ñande rehe. Ha’e niko ipy’a porä, ñande poriahuvereko, ñande rayhu oñangareko jave ñande rehe.

Ñandejára Ipu’akapáva oñemboja ñande rendápe imba’e porä ha imborayhu ijojaha’ÿva reheve: Ipu’aka osämbyhy haguä ha ipu’aka oñangareko haguä ñande rehe. Tekotevë ñamomba’eguasu chupe!

EHECHAKUAA IÑARANDU IJOJAHA’YVA. Profeta Isaías omombe’u ñandéve Ñandejára ndopytu’uiha ojapo aja opaite mba’e. Ha’e niko ohechakuaapaite opa mba’e medida. Pe versículo 12 niko iporäiterei ha he’i kóicha: “Máva piko oha’ära’e umi yguasu ipo mbytépe, térä ikuäme yvága pukukue ha ipekue?” Ñandejára ojapóramo guare yvy ha oipyso yvagakuéra Ha’e hendaitépe omoï opaite mba’e, anítei mba’eve opyta hendape’ÿ. ¡Ñamomba’eguasu Ñandejárape!

Angirü che rendúva, ko yvy ape ha ipype oïva guive, ndoikói por casualidad. Ñandejára ojapova’ekue opaite mba’e, omedi opa mba’e ipekue térä ipukukue, oha’ä ha omohendapaite opyta porämba haguä. Ha’e oipyso yvagakuéra. Omopyrenda porä yvy. Oha’ä ha omohendapa yvytykuéra, ñukuéra, ka’aguykuéra, yvy ha yguasukuéra. Ñandejára ojapopa ko’ä mba’e iñarandu ha ipu’aka ijojaha’ÿva rupive, péicha avei opaite mba’e omba’apo hendaitépe. Ehechakuaa Ñandejára arandu ijojaha’ÿva.

Tekotevë jahechakuaa Ñandejára Ipu’akapáva, Imarangatúva, iñarandu ijojaha’ÿ. Hembiapokuéra ojapova’ekue hekoitépe ha hendaitépe, Ha’e oipotahaguéicha ipu’aka ha iñarandu reheve.

Ñandejára ñande Apohare niko ijojaha’ÿ. Ha’e Ipu’akapa, oisämbyhy opaite mba’e, opaite mba’e oguereko ipo guýpe. Ejepy’amongetami mba’eichaitépa Ñandejára ñande Apohare. Péicha avei romokyre’ÿ ehechakuaa haguä Iñe’ë marangatu opa árape guaräva. Ehechakuaáke imba’e poräha opavave ndive oisämbyhy aja hembiapokue. Ehechakuaáke avei iñarandu ijojaha’ÿva, Ñandejára niko ojapova’ekue opaite mba’e, péicha avei oñangareko hembiapokuére. Ipyapy mbaretépe omoï opaite mba’e ipo guýpe. Ñandejára Ipu’akapa, chupe añoite ñamomba’eguasuva’erä.

Receive Weekly Encouragement

Sign-up to get a sermon straight to your inbox on a weekly basis!