Mesías sämbyhy
Ko yvy ape jerére maymávante oheka py’aguapy, sarambi ha javorái katu oï opa rupiete. Ñahendu ha ñamoñe’ë ko’ë ko’ëre opa tetä rupi apañuäi mante oï. Heta henda rupi, tekovekuéra noñeñandu poräi, oïgui javorái, jeikovai ha ñorairö. Ijetu’u jahupyty haguä py’aguapy, ko yvy apére oïgui jeikovai py’ÿiete.
Heta oï ndohechakuaáiva ha ndoikuaáiva voi moöguipa ou jeikovai térä ñorairö. Pe conflicto niko Aña ha Ñandejára apytépe. Upévare niko hetaite mba’e oï hendape’ÿ.
Ajuhu la Biblia, Ñandejára ñe’ëme, ko yvy oïháicha ko’ágä rupi, ndaha’éi upe ojehuva’eräkuri. Ambue hendáicha ha’éta, Ñandejára nañandeapói jaiko haguä ñorairöme térä ñapu’ä haguä ojoehe. Ñandejára ñandeapova’ekue jaiko haguä py’aguapy reheve. Oñemoaguï upe ára Ñandejára Poravopyre ou jey ha oisämbyhy haguä. Upérö oïta py’aguapy. PE MESÍAS SÄMBYHY ojehai Isaías capítulo 11, versículo 1 guive 14 peve, upéva jajuhu Antiguo Testamento, La Bíbliape. Ehendumi mba’épa he’i:
1. Osëva’erä peteï yvyra rakä Isaí yvyrágui, ha peteï hoky pyahu hi’ava’erä hapokuéragui.
2. Ñanderuete Pytu Poräite oguejyva’erä hi’ári; pytu oikuaapáva ha arandu reheguáva, pytu ohekombo’éva ha Ipu’akapáva, pytu omoarandúva ha omongyhyjéva oúta Ñanderuetégui.
3. Ha’e ohekombo’éta iñe’ërendu haguä ha okyhyje haguä Ñanderuetégui, nombojovakemo’äi hesa ohechaháicha, térä ijapysa ohenduháicha;
4. ombojovakéta hekoitépe umi imboriahúvape, ha hekojojápe ombohovakéta umi tetäygua oñemomirïvape; oinupäta katu umi iñañávape ha ipytu poräitépe ojukáta umi hese ojerovia’ÿvape.
5. Ha pe tekojoja iku’a jokuaha, ha teko jeroviaha hete mo’äha.
6. Pe aguara guasu oikóta ovecha ra’y rusu ndive, ha pe jaguerete oñenóta kavara ra’y ndive; pe vaka ra’y rusu, pe león ndive ha mymba iñaröva’ekue oikova’erä oñondive, ha peteï mitä oñangarekóta hesekuéra.
7. Vaka ha oso ho’úta kapi’i, ita’yrakuéra oñenóta oñondive; ha pe león ho’úta avei kapi’i vakakueraicha.
8. Ha pe mitä okambúva oñembosaráita pe mbói raity ykére, ha pe mitä opo’oramóva ipojáita mbói raitýre.
9. Ndojapomo’äi ivaíva ha nomongy’amo’äi che yvyty amboykeva’ekue; pe tetä henyhëta pende Ruete arandúgui, ku y omyenyhëháicha pe yguasu.
10. Ojehuva’erä upe ára upévape umi tetä ohekava’erä Isaí rapo oñembo’ýramo ipoyvi vevévaicha tetanguérape guarä, ha pe tenda ha’e oikohápe ojajaipáta.
11. Ha ojehuva’erä avei upe ára upévape, Ñanderuete omopu’ä jevýta ipo oguenohë jevy haguä hetä rembyre opytava’ekue Asiria, Egipto, Patros, Etiopía, Elam, Sinar ha Hamat, ha yguasu pegua tetänguérape.
12. Omopu’äta mba’e rechaukaha tetänguérape, Israelgui ojererahava’ekuépe ogueru jeýta, Judagua isarambívape ombyatýta, irundyve yvy apýragui omboúta.
13. Opáta Efraíngua py’arasy, Judá ndive ojopýva oñehundíta. Efraín nda’ipy’arasymo’ävéi Judá ndive, Judá nopu’ämo’ävéi Efraín rehe.
14. Kuarahy reike gotyo, moköivéva ojepoíta filisteokuéra rehe, ha kuarahy reike gotyo oikóvagui oipe’áta imba’eta. Ipo Edom ha Moab guare oipysóta, Amóngua ipoguýpe opytáta.
Ko’ápe oñemombe’u ñandéve umi mba’e OJEHÚTAVA ágä pe Mesías ou vove oisämbyhy haguä.
REY DAVID ÑEMOÑARE OIKOVE JEÝTA. Profeta Isaías omoñepyrüháicha ko capítulo ininteresante ha ñanemopensa. Isaías oñe’ë ñandéve peteï yvyramáta oñekytïva’ekuére ha ojeheja imáta karapete, yvýre. Upe vaicha ipirupava’ekue ¡peichahágui oñepyrü osë chugui hoky pyahu! Peteï yvyra rakä pyahu hoky.
Iporäite ko Isaías ohechaukáva ñandéve ñe’ë rupive. Peteí yvyra rakä osë Isaí yvyrágui, ha peteï hoky pyahu osë hapógui. Upeichaite ojehuva’ekue Jesús onaséramo guare táva Belénpe, ohasáma heta ary. Pe Mesías omoingove jeýta rey David ñemoñarenguérape. Jesús ha’e pe Isaí yvyra rakä, ha upe hoky pyahúva.
La Biblia he’i ñandéve Ñanderuete Espíritu Santo oguejyva’eräha hi’ári. Jahecháta mba’éichapa Profeta Isaías omoï mbohapy temimo’ä oñondive ohaívo kóicha: “Pytu oikuaapáva ha arandu reheguáva, pytu ohekombo’éva ha Ipu’akapáva, pytu omoarandúva ha omongyhyjéva oúta Ñanderuetégui.” Versículo 2pe jajuhu ko’ä mbohapy ñe’ë oñomoirüva. Ikatu ja’e umíva ha’e katupyry ijojaha’ÿva pe Mesías oisämbyhy haguä.
Ñandejára Pytu Marangatu oguejy pe Mesías ári ojapo haguä hembiapo ha oiko haguä chugui sämbyhyhára. Ha’e niko hekojojáta, opaite mba’e ojapóta hekoitépe ha ohepyme’ëta opavavépe hendaitépe. Ha’e ohundíta aña ha mba’e vai. Noporombojovakemo’äi upe oje’énteva rehe chupe térä upe vaicha ohechávare, uvei ojusgáta tekojoja reheve ha omopyrendáta tekojoja ko yvy ape ári. Ipytúpe ojukáta umi iñañávape. Ha’e niko hekojoja ha ijeroviapýta opaite mba’e ojapóvape oisämbyhy aja David apyka guasu guive.
Pe Mesías niko David ñemoñare añete ha Ha’e oguapyva’erä ijapyka guasúpe osämyhy haguä. Jajuhu Isaías 11pe Ha’e oguapytaha peteï ára upe David apyka guasúpe, upe ára Ñandejára añoite oiporavo ha Ha’e añoite oikuaa araka’étape.
HA’E OMYATYRÖTA YVATY EDEN. Ñamoñe’ëvo ko’ä versículo ñanemopy’a kyrÿi mba’éichapa aguara guasu ha ovecha ra’y, jaguareté ha kavara ra’y, vaka ra’y ha león, vaka ha oso, oikóta oñondive. Ita’yrakuéra oñenóta ojoykéra. Oïta py’aguapy mymbakuéra apytépe, oiko poräta oñondive. Ko’ágä niko tuicha iñambue, aguara guasu ho’u ovecha ra’y ha, jaguerete ojuka kavara ra’ýpe, león ojuka vaka ra’ýpe, ha pe oso ojuka vakápe. Pe Mesías oisämbyhy vove omyatyröta opaite mba’e yvaty Edénpe.
Ndaha’éi py’aguapýnte oïtava mymbakuéra apytépe, oïta avei py’aguapy kuimba’ekuéra ha mymbakuéra apytépe. Upeichaite, la Biblia, Ñandejára ñe’ë he’i ñandéve versículo 6pe, peteï mitä oñangarekotaha hesekuéra. Ndaiporimo’ävéima kyhyje oïháicha ko’ágä. Mymbakuéra okyhyje ojoehegui ha okyhyje avei kuimba’égui. Péicha avei kuimba’e okyhyje mymbakuéra ñarögui. Upe ojoavyha ojehai kóicha Isaíaspe: “Ha pe mitä okambúva oñembosaráita pe mbói raity ykére, ha pe mitä opo’oramóva ipojáita mbói raitýre.” Ndaiporimo’ävéima mba’eveichagua kyhyje. Oïta py’aguapy kuimba’e ha mymbakuéra apytépe.
Oïta py’aguapy kuimba’ekuéra ha Ñandejára ndive ave. La Biblia he’i ñandéve ko’ápe Isaíaspe kóicha: “Ndojapomo’äi ivaíva ha nomongy’amo’äi che yvyty amboykeva’ekue; pe tetä henyhëta pende Ruete arandúgui, ku y omyenyhëháicha pe yguasu.” Iporäite ko’ä ñe’ë. Pe Mesías omyatyröta opaite mba’e yvaty Edénpe. Upe ára pe Mesías ha’éta techaha opavavépe guarä. Oúta ha ohekáta chupe, péicha avei ojuhúta pytu’u ipype. Pe Mesías ha’e upe ikatúva omyatyrö opaite mba’e Edénpe.
HA’E OMBYATYPÁTA HETÄYGUA ISARAMBÍVAPE. Opavave oikuaa judiokuéra ha’eha táva Ñandejára oiporavova’ekue ymaite guive imba’erä. Hesakä porä upéva ñamoñe’ëvo la Biblia. Opavave avei oikuaa judiokuéra ko’ágä rupi isarambipaha ko yvy jerére. ÑANDEJÁRA ome’ëva’ekue iñe’ë naiñe’ërendúiramo ha ohejáramo ichupe, HA’E omsarambitaha chupekuéra opa rupiete, ha upéichaite ojehuva’ekue.
Ko’ágä katu profeta Isaías he’i: “Ha ojehuva’erä avei upe ára upévape Ñanderuete omopu’ä jevýta ipo oguenohë jevy haguä hetä rembyre opytava’ekue.” Angirü che rendúva, che agueroviava’erä pe Ñandejára ñe’ë he’íva. Che aguerovia he’íva la Biblia. Upévare aguerovia pe Mesías ombyatypataha hetägua isarambíva opa rupiete ko yvy jerére. Ha’e ogueruva’ekue hetäguáme ambue tetägui, oho haguépe ymave jepokuapy, upéva ojapova’ekue ombosako’i haguä Mesías jeju ñepyrüete onase haguä. Ha ko’ágä ombyatýta chupekuéra ombosako’i haguä tape pe Mesías ou haguäicha oisämbyhy. Ñandejára oguerúta chupekuéra opaichagua tenda oïhágui. Ha jajuhu heta tetä réra ymaguare, jajuhu aranduka Isaíaspe: “Asiria, Egipto, Patros, Etiopía, Elam, Sinar ha Hamat, ha yguasu pegua tetänguérape.” Upéicharö, opaichagua tenda oïhaguépe ojevýta hetä Israelpe. Pe Mesías ombyatypáta chupekuéra.
Ha’e ombyatýta hetäguáme irundyve yvy apýragui. Efraín niko tembiasa jajuhúva la Bibliape, ha’eva’ekue umi diez tribu oïva norte gotyo, ha’ekuéra ojeiva’ekue ha omomba’eguasu ta’anga gua’ukuérape ohejávo Ñandejárape. Judá katu, ha’eva’ekue umi moköi tribu sur gotyo oïva, ha’ekuéra areve omomba’eguasuva’ekue Ñandejárape. Upéicharö, ko’ápe profeta Isaías he’i Ñandejára ombyatypa jeytaha chupekuéra. Ha’ekuéra noñorairömo’ävéima oñondive. Ojogueraha porä jeýta. He’i Isaías: “Opáta Efraíngua py’arasy, Judá ndive ojopýva oñehundíta. Efraín nda’ipy’arasymo’ävéi Judá ndive, Judá nopu’ämo’ävéi Efraín rehe.” Ha’ekuére oñomoirü jeýta pe Mesías oisämbyhy vove. Ko’ápe opa ñane rembiapo. Ñandejára tanderovasa!
