Isaías 26:1-9
Opavave tekove ojerovia ambue mba’ére ha opaite mba’ére. Oï hetaháichagua jeroviapy yvy ape ári, ha upévare py’ÿínte gentekuéra oñeporandujoa:
Yvy ape áripa ojojapa jeroviakuéra? Péicha oporandu avei chéve peteï karai: “Añetehápepa, religionkuéra peteïcha meme, ajépa, Dr. Yoder?”. Ambohovái chupe: “Nahániri, umi yvyporakuéra jeroviaukapy ndaha’éi peteïcha meme. Ojojapa rire jeroviakuéra natekotevemo’äikuri ou ÑANDEJÀRA, pe yvyty Sinaípe ome´ë haguä Moiséspe tembiapoukapykuéra. ¿Ajépa?
Kuimba’ekuéra opaicharei oheka ÑANDEJÁRAPE ha upévare jaguereko hetaháichagua religión.
Pe religión ha’etéva, ohechaukáva ñandéve La Biblia; omombe’u ñandéve; oïha peteï ÑANDEJÁRA añónte; pe añetetéva.
Upévare, añemopyrendávo La Bíbliare amombarete che jerovia, peteï ÑANDEJÁRA año rehente. Che mandu’a upe he’íva Antiguo Testamentope, Deuteronomio 6:4pe, upépe he’i: “Ehendu Israel, ÑANDEJÁRA peteï, HA’E peteïnte.” Amoïsete nde réra upépe ha’évo ndéve: “Ehendu che angirü: ÑANDEJÁRA peteï, HA’E peteïnte.”
Oimanteva’erâ mba’érepa tekotevê ñamoî ñande jerovia ÑANDEJÁRA Bìbliape guáre. La Biblia noguerokirirîri, ága katu ombohovái jeyjey omyesakä haguäicha ñandéve. Antiguo Testaméntope, Isaías capítulo 26, versículo 1 guive, 9 peve, jajuhu mbohovái, upépe he’i kóicha:
1. Upe árape ojepurahèita péicha Judápe: “Roguereko táva imbaretéva. Rosê haguâ jejopyvaígui, Ñandejára omoî tápia jo’a ha óga mbarete.
2. Peipe’a okênguéra oike haguâ tetâ marangatu, nopyrûiva iñe’ënguére.
3. Nde remoingo py’aguapýpe umi ojepytasokuaávape ojeroviágui nde rehe.
4. Opa ára pejerovia Ñandejára rehe. Ha’e mo’âha opa árape guarâva.
5. Ha’e omongúiva’ekue umi yvate oikóvape ha oity yvýre táva yvate.
6. Opyrû haguâ hese umi ojeapo’íva, ha ohasa haguâ hi’ári umi imboriahúva.”
7. Imarangatúva rape naikarêi. Nde rejapo chupe guarâ tape ojojáva.
8. Ore avei roñeñandu kyhyje’ÿre upe tape remoîvape ne rembiapoukapy rupi, ore Jára. Nde réra rehe ore mandu’a asy!
9. Che py’aite guive nde rehe che âho pyharekue, ko’ê mboyve guive roheka che py’apýpe. Reporombojovakéramo yvy ári, yvypóra oikuaáta mba’épa he’ise tekojoja.
Isaías omombe’u chéve guarâ opa mba´e añetegua ikatu hagûáicha ñande jajerovia ÑANDEJÁRA Bíblia peguávare.
HA’E PE ÑANDEJÁRA AÑETETÉVA, chugui jaguereko pysyrô ha mba’ekuaapy. Profeta Isaías he’iva’ekue pysyrô ouha ÑANDEJÁRAGUI. Pysyrô he’ise sâso, sâso pe angaipa poguýgui, sâso jaguereko haguâ py’aguapy ha ñamomba’eguasu haguâ ÑANDEJÁRAPE. Ñandejára añoite ome’ëkuaa pysyrö, upéva chugui ou.
Añete ha tekojoja oho ojopóre, ha ¡iporâite ohóvo oñondive! He’iháicha: “oikéta gentekuéra hekojojáva, ohayhúva añetegua” ¡ÑANDEJÀRA hekojoja! Opavave jaguerohory pe añetegua, ndaipóri yvypóra ko yvy ape ári ojepopetéva ijapúvape. Heta oî ijapúva, ha maymávante ñamocha’î ñande rova umi ijapúpe, ndaikaúigui jajerovia upeichaguáre, ndojapóigui upe oï porâva. Pe añete ha tekojoja oiko oñondive. Tetâ tekojojápe oikóva ha ohayhúva añetegua, oguerekóta jehovasa.
ÑANDEJÁRA, ha’e ÑANDEJÁRA añeteguáva. Moisés, pe profeta guasu ymaguare, Ñandejára oñeme’ëva’ekue chupe tembiapoukapykuéra. ÑANDEJÀRA Ñe’ê, Deuteronomio 32:4pe he’i: “HA´E pe ita guasu ñanemo’âhára, hembiapokue ndaijojahái; hape hekojoja. Ha’e ÑANDEJÀRA jeroviaha, naiñañái. HA’E hekojoja, naipokarêi.”
Jajeroviava’erâ ÑANDEJÀRA Biblia peguávare ¡HA’E añoite pe ÑANDEJÀRA añeteguáva! Eheka rehekahápe añetegua nderejuhumoâi ÑANDEJÁRA Bíblia pegua rehe’ÿ. HA’E pe Ñandejára añeteguáva. HA’E ÑANDEJÁRA añetete.
ÑANDEJÁRA IJEROVIAPY, chugui ou py’aguapy ha pu’aka. “Nde remoingo py’aguapýpe umi ojepytasokuaávape ojeroviágui nde rehe.” Py’aguapy oguereko pe ojerovia añetéva. Ha kyhyje’ÿ ou pe jeroviaha ipyrendaporâramo. ÑANDEJÁRA añoite ha’e pyrenda nañanembojavymo’äiva. HA’E pe jeroviaha añetete. Py’aguapy rape peteïnte oî. Ndaipóri heta tape, peteînte oî. Jaguerekóta py’aguapy ñande jerovia oîramo ÑANDEJÁRARE.
Mbarete ogueru jerovia. ÑANDEJÁRA ha’e pe Ipu’akapáva. “ÑANDEJÁRA Ipu’akapávare oî mbarete opa árape guarâva”. Pe mbarete opa’ÿva araka’eve ñane mokyre’ÿ jajerovia haguä ko’ê ko’êre ÑANDEJÀRARE. Imbarete ha Ipu’aka ndoguéi. HA’E na’ikaneöi ha naikangýi araka’eve. ÑANDEJÁRA pu’aka ndoguéi araka’eve, upévare jajeroviakuaa hese.
ÑANDEJÁRA ha’e pe Ipu’akapáva. HA’E omboguejy mburuvichápe. Rey David Salmo 18:1 ha 2pe ohai kóicha: “Rohayhu ÑANDEJÁRA, ndehína pe chemombaretéva, chemo’âva mba’e vaígui. Nde che pysyrôhára, nde rehe añónte ajerovia.” Tekotevë jajerovia ÑANDEJÁRA Biblia peguáre; HA’E añónte ÑANDEJÁRA añetegua ikatuha jajerovia jajavy’ÿre.
ÑANDEJÁRA NDIVE JAHUPYTY MBA’EPORÂ, chugui ou tekojoja ha py’a porâ. Pe tekojoja ñanemopyrenda jahupyty hagûa mba’eporâ. ÑANDEJÁRA ohechakuaa ha oheja jaiporavo haguâ ñande rape. HA’E oikuaa moôpa ipyahe hína pe ojeroviáva hese. Upeichaite, “Nde ha’éva Tekojoja, ehechakua pe hape potîva rape”. Ñanemandu’ávo héraremavoi ñanemopirîmba, he’iháicha pe Profeta: “Che aha’arô aikuaaségui nde réra”.
Tekojoja rape ijyvotypa ÑANDEJÀRA ohechaukápe imba’eporâ. Tembipota Ñandejárare hypy’ûva oî Profeta korasôme. Upévare ko’ë mboyve ohekáma chupe. Oguahëta pe ára ÑANDEJÁRA rembipota ojejapotaha. Pe profeta he’i kóicha: “Reporombojovakéramo yvy ári, yvypóra oikuaáta mba’épa he’ise tekojoja”. ÑANDEJÁRA ha’e pe mba’eporâ reruha.
Jesús ohejava’ekue ñandéve techapyrä ñañembo’e haguä, ñanembo’eva’ekue ñamba’ejerure haguä kóicha: “Ore Ru yvágape reiméva, toñemomba’eguasu nde réra
marangatu. Eju oresämbyhy. Tojejapo ne rembipota yvy ári yvagapeguáicha”. Ymavémavoi Profeta Isaías he’iva’ekue ÑANDEJÁRA ñembojovake ou vove ko yvy ape ári, yvyporakuéra oikuaáta mba’épa he’ise tekojoja”. Upérô ÑANDEJÁRA rembipota ojejapóta yvy ape ári ojejapoháicha yvágape.
Angirü, tekotevê rejerovia ÑANDEJÁRA Biblia peguáre, HA’E añoite ome’êta ndéve mba’eporä. Hembipota ojejapóta katuétei. Hi’â chéve rejerovia hese añetehápe.
Ko’ä mbohapy mba’e ñanemokyre’ÿ jajerovia haguâ ÑANDEJÁRARE: HA’E Ñandejára añetegua. HA’E Ñandejára jeroviapy. HA’E Ñandejára mba’e porâ me’ëha. Ko’â mba’e ome’ë ñandéve py’aguapy. Ñanemandu’a jeýna upe he’íva Isaías 26:3pe: “Nde remoingo py’aguapýpe umi ojepytasokuaávape ojeroviágui nde rehe”.